വരന് വിവാഹ സമ്മാനമായി കൂട്ടുകാര്‍ നല്‍കിയത് 5 ലിറ്റര്‍ പെട്രോള്‍. തമിഴ്നാട്ടിലെ ചിദംബരത്താണ് സംഭവം. ഇന്ധന വില റോക്കറ്റുപോലെ കുതിക്കുമ്പോഴാണ്  വേറിട്ട വിവാഹ സമ്മാനം കൂട്ടുകാർ നൽകിയത്. തമിഴ്നാട്ടില്‍ പെട്രോള്‍ വില 85 രൂപ കടന്നതോടെയാണ് യുവാക്കള്‍ കൂട്ടുകാരന് സമ്മാനമായി പെട്രോൾ തന്നെ നൽകിയത്.

കുമരച്ചി ഗ്രാമത്തിലെ ഇലഞ്ചെഴിയനും കനിമൊഴിയുടെയും വിവാഹമായിരുന്നു കഴിഞ്ഞ ദിവസം നടന്നത്. ഡി.വൈ.എഫ്.ഐ പ്രവര്‍ത്തകരായ സുഹൃത്തുക്കളാണ് ദമ്പതികള്‍ക്ക് പെട്രോള്‍ സമ്മാനമായി നല്‍കിയത്. രാജ്യത്ത് ഇന്ധനവില കുതിച്ചുയരുന്നതിനെതിരായ പ്രതിഷേധമാണ് ഈ പ്രതികരണമെന്ന് ഡി.വൈ.എഫ്.ഐ പ്രവര്‍ത്തകനായ പ്രഭു പറഞ്ഞു. ഇന്ധനവില ദിനംപ്രതി കൂടുന്നത് സംബന്ധിച്ച് വിവാഹത്തില്‍ പങ്കെടുക്കാനെത്തിയവരെ ബോധവല്‍ക്കരിക്കുക എന്നൊരു ലക്ഷ്യം കൂടിയുണ്ടായിരുന്നുന്നെന്ന് പ്രഭു പറഞ്ഞു.

ദമ്പതികള്‍ക്ക് ലഭിച്ച വിവാഹ സമ്മാനം കണ്ട് കുടുംബാംഗങ്ങള്‍ ആദ്യം അന്തം വിട്ടു. കൂട്ടുകാര്‍ തന്നെ ആ പെട്രോള്‍ വരന്‍റെ ബൈക്കില്‍ നിറച്ച ശേഷമാണ് മടങ്ങിയത്.