രാജ്യത്ത് അനുദിനം ഇന്ധന വില വര്‍ധിക്കുന്ന സാഹചര്യത്തില്‍ ജനങ്ങള്‍ക്ക് ആശ്വാസമായി കര്‍ണാടക മുഖ്യമന്ത്രി എച്ച്‌ ഡി കുമാരസ്വാമിയുടെ പ്രഖ്യാപനം. കര്‍ണാടകയില്‍ പെട്രോളിന്റെയും ഡീസലിന്റെയും വില ലിറ്ററിന് രണ്ട് രൂപ വീതം കുറയ്ക്കുമെന്ന് കുമാരസ്വാമി വ്യക്തമാക്കി. ഇന്ധന വിലയിന്‍മേല്‍ സംസ്ഥാനം ചുമത്തുന്ന മുല്യവര്‍ധന നികുതി (വാറ്റ്) കുറയ്ക്കാനാണ് പദ്ധതി.

കഴിഞ്ഞ ദിവസം ആന്ധ്രാ പ്രദേശും രാജസ്ഥാനും ഇന്ധന വിലയില്‍ ചുമത്തിയിരുന്ന വാറ്റ് കുറച്ചിരുന്നു. ഇതോടെ ഇരുസംസ്ഥാനങ്ങളിലും യഥാക്രമം രണ്ട് രൂപയുടെയും രണ്ടര രൂപയുടെയും കുറവാണ് ഉണ്ടായത്. കല്‍ബുര്‍ഗിയില്‍ വെച്ചായിരുന്നു അദ്ദേഹത്തിന്റെ പ്രഖ്യാപനം.

ഇന്ധനവില ദിനം പ്രതി കുതിച്ചുയരുകയാണ്. നികുതി കുറയ്ക്കുന്നതോടെ ഇന്ധനവില കുറയുമെന്ന പ്രതീക്ഷയിലാണ് കര്‍ണാടകയിലെ ജനങ്ങള്‍. കര്‍ണാടകയിലെ സഖ്യകക്ഷി സര്‍ക്കാര്‍ പെട്രോളിന്റെയും ഡീസലിന്റെയും വില രണ്ട് രൂപവീതം കുറയ്ക്കാന്‍ തീരുമാനിച്ചതായി ഞാന്‍ നിങ്ങളെ അറിയിക്കുകയാണ്. സര്‍ക്കാരിന്റെ തീരുമാനം ജനങ്ങള്‍ക്ക് ആശ്വാസമാകുമെന്ന് കരുതുന്നു എന്ന് കുമാരസ്വാമി പറഞ്ഞു.