ഗോവ മുഖ്യമന്ത്രി മനോഹര്‍ പരീക്കര്‍ അവധിയില്‍ പ്രവേശിച്ചതോടെ പുതിയ കരുനീക്കങ്ങളുമായി കോൺഗ്രസ്; സര്‍ക്കാര്‍ ഉണ്ടാക്കാന്‍ ക്ഷണിക്കണം എന്ന ആവശ്യവുമായി കോണ്‍ഗ്രസ് എംഎല്‍എമാര്‍ ഗവര്‍ണർക്ക് കത്ത് നൽകി
ഗോവ മുഖ്യമന്ത്രി മനോഹര്‍ പരീക്കര്‍ അസുഖബാധിതനായി അവധിയില്‍ പ്രവേശിച്ചതോടെ ഗോവയില്‍ പുതിയ കരുനീക്കങ്ങളുമായി രംഗത്തെത്തിയിരിക്കുകയാണ് കോണ്‍ഗ്രസ്. സര്‍ക്കാരിനെ പിരിച്ചുവിട്ട് തങ്ങള്‍ക്ക് അവസരം നല്‍കണം എന്നാണ് കോണ്‍ഗ്രസ് ആവശ്യം ഉന്നയിച്ചിരിക്കുന്നത്. പ്രതിപക്ഷ നേതാവായ ചന്ദ്രകാന്ത് കാവ്‌ലേക്കറാണ് ആവശ്യവുമായി രംഗത്തെത്തിയിരിക്കുന്നത്.
സര്‍ക്കാര്‍ ഉണ്ടാക്കാന്‍ ക്ഷണിക്കണം എന്നാവശ്യപ്പെട്ട് കോണ്‍ഗ്രസിന്റെ 16 എംഎല്‍എമാര്‍ ഒപ്പിട്ട കത്ത് ഗവര്‍ണര്‍ മൃദുല്‍ സിന്‍ഹയ്ക്ക് സമര്‍പ്പിച്ചതായി ചന്ദ്രകാന്ത് അറിയിച്ചു. മറ്റ് പാര്‍ട്ടികളുടെ പിന്തുണ തങ്ങള്‍ക്കുള്ളതായും സര്‍ക്കാര്‍ രൂപീകരിക്കാന്‍ സാധിക്കും എന്നുമാണ് അവകാശപ്പെടുന്നത്.
ഗോവയിലെ പ്രതിസന്ധിക്ക് പരിഹാരം കാണുന്നതിനായി ബിജെപിയുടെ കേന്ദ്ര നേതാക്കള്‍ ഗോവയില്‍ എത്തിയിരുന്നു. ഇതിനു പിന്നിലെയാണ് കരുനീക്കങ്ങളുമായി കോണ്‍ഗ്രസും രംഗത്തെത്തിയിരിക്കുന്നത്. സഖ്യ കക്ഷികള്‍ തങ്ങളോടുള്ള പിന്തുണ വീണ്ടും അറിയിച്ചതായി മുതിര്‍ന്ന ബിജെപി നേതാവായ റാം ലാല്‍ നേതാക്കളുമായുള്ള കൂടിക്കാഴ്ചയ്ക്ക് ശേഷം വ്യക്തമാക്കിയിരുന്നു. എല്ലാവരുടെയും അഭിപ്രായങ്ങള്‍ തേടിയതായും അവ ദില്ലിയിലെ നേതാക്കളെ അറിയിച്ചതായും റാം ലാല്‍ പറഞ്ഞു.
2017 ലെ തെരഞ്ഞെടുപ്പില്‍ ആര്‍ക്കും കേവല ഭൂരിപക്ഷം ലഭിക്കാതിനെ തുടര്‍ന്ന് ഗോവ ഫോര്‍വേഡ് പാര്‍ട്ടി, മഹാരാഷ്ട്രവാദി ഗോമണ്ഡക് പാര്‍ട്ടി, മൂന്ന് സ്വതന്ത്രര്‍ എന്നിവരെ കൂട്ടുപിടിച്ചാണ് ബിജെപി സര്‍ക്കാര്‍ രൂപീകരിച്ചത്. കേന്ദ്ര മന്ത്രിയായിരുന്ന മനോഹര്‍ പരീക്കര്‍ സ്ഥാനം രാജിവെച്ച്‌ മുഖ്യമന്ത്രിയായി ചുമതലയേല്‍ക്കുകയും ചെയ്തു.
https://www.facebook.com/Malayalivartha
