കോണ്ഗ്രസിന്റെ നേതൃത്വത്തിലാണ് രാജ്യത്ത് വന് സ്വാതന്ത്ര്യസമരം നടന്നത്; ആര്.എസ്.എസ് ശിബിരത്തില് കോണ്ഗ്രസിനെ പുകഴ്ത്തി ഭാഗവത്
ആര്.എസ്.എസ് ശിബിരത്തില് കോണ്ഗ്രസിനെ പുകഴ്ത്തി ആര്.എസ്.എസ് സര് സംഘചാലക് ഡോ. മോഹന് ഭാഗവത്. കോണ്ഗ്രസിന്റെ നേതൃത്വത്തിലാണ് രാജ്യത്ത് വന് സ്വാതന്ത്ര്യസമരം നടന്നത്. ആ സമരം ആത്മസമര്പ്പിതരായ മഹദ് വ്യക്തികളെ സമ്മാനിച്ചു. അവര് ഇപ്പോഴും നമുക്ക് പ്രചോദനം നല്കുന്നു. സ്വാതന്ത്ര്യസമര പ്രസ്ഥാനം സാധാരണക്കാരെയും അതിലേക്ക് ആകര്ഷിച്ചു. രാജ്യം സ്വാതന്ത്ര്യം കൈവരിച്ചതില് അവരുടെ പങ്ക് നിര്ണായകമാണ് -ഭാഗവത് പറഞ്ഞു.
'ഭാവി ഭാരതം എങ്ങനെ' എന്ന വിഷയത്തില് ഡല്ഹിയില് ആര്.എസ്.എസിന്റെ പ്രഭാഷണ പരമ്പരയിലാണ് അദ്ദേഹം ഇക്കാര്യം വ്യക്തമാക്കിയത്. ഇന്ത്യയുടെ വൈവിധ്യം ഭിന്നതക്ക് കാരണമാകരുത്. രാജ്യത്തിന്റെ നാനാത്വം ആദരിക്കുകയും ആഘോഷിക്കുകയും വേണം. അത് സമൂഹത്തില് ഒരുതരത്തിലുള്ള കലഹത്തിനും കാരണമാകരുത്.
ആര്.എസ്.എസിനെ മറ്റു സംഘടനകളുമായി താരതമ്യം ചെയ്യരുതെന്നും അദ്ദേഹം പറഞ്ഞു. വിവിധ വിശ്വാസങ്ങളുടെയും മാര്ഗങ്ങളുടെയും അടിസ്ഥാന ദര്ശനം ഒന്നുതന്നെയാണ്. മനുഷ്യര്ക്ക് ഒറ്റക്ക് ജീവിക്കാനാവില്ല. കൂട്ടായി മാത്രമേ മുന്നോട്ടു പോകാനാവൂ. ഓരോരുത്തരും ഒറ്റക്ക് ഭക്ഷണം കഴിക്കുമ്പോള് അവര്ക്ക് ഇഷ്ടമായത് കഴിക്കാം. എന്നാല്, കൂട്ടത്തില് കഴിക്കുമ്പോള് അതില് നിയന്ത്രണങ്ങള് വരും. ആ നിയന്ത്രണം സ്വയം നടപ്പാക്കുമ്പോഴാണ് കാര്യങ്ങള് സുഗമമാകുന്നത് -ഭാഗവത് അഭിപ്രായപ്പെട്ടു.
ആര്.എസ്.എസ് ക്ഷണിച്ചിരുന്നുവെങ്കിലും പ്രധാനപ്പെട്ട പ്രതിപക്ഷ പാര്ട്ടി പ്രതിനിധികള് ചടങ്ങിനെത്തിയില്ല. ബി.ജെ.പിയുടെ നിരവധി നേതാക്കളും ബോളിവുഡ് നടന്മാരും വിദ്യാഭ്യാസ പ്രവര്ത്തകരും മറ്റും പങ്കെടുത്തു. വിജ്ഞാന് ഭവനില് ബുധനാഴ്ച വരെയാണ് പ്രഭാഷണം. ആര്.എസ്.എസിനെക്കുറിച്ച് ഡോക്യുമന്റെറി പ്രദര്ശിപ്പിച്ചു.
https://www.facebook.com/Malayalivartha