ജാമ്യാപേക്ഷ പരിഗണിക്കുന്ന അവസരത്തില്‍ കോടതികള്‍ കേസിന്റെ ന്യായാന്യായത്തെക്കുറിച്ച് കൂടുതല്‍ വിശകലനം ചെയ്യേണ്ട കാര്യമില്ലെന്ന് സുപ്രീംകോടതി. ആരോപണവിധേയന്റെ സമൂഹത്തിലെ സ്വാധീനം, ജാമ്യം ലഭിച്ചാല്‍ തെളിവ് നശിപ്പിക്കാനും സാക്ഷികളെ സ്വാധീനിക്കാനുമുള്ള സാധ്യത, ഉന്നയിക്കപ്പെട്ടിട്ടുള്ള ആരോപണങ്ങളുടെ ഗൗരവം, ക്രിമിനല്‍ പശ്ചാത്തലം, ആരോപണവിധേയനെതിരെ മുമ്പ് നിലനില്‍ക്കുന്ന കേസുകള്‍ തുടങ്ങിയ ഘടകങ്ങള്‍ പരിശോധിച്ചാകണം ജാമ്യാപേക്ഷകളില്‍ തീരുമാനം എടുക്കേണ്ടതെന്നും ജസ്റ്റിസുമാരായ എല്‍ നാഗേശ്വരറാവു, മോഹന്‍ ശന്തനഗൗഡര്‍ എന്നിവര്‍ അംഗങ്ങളായ ബെഞ്ച് നിരീക്ഷിച്ചു.

കൊലക്കേസ് പ്രതി ഒഡിഷ സ്വദേശിയായ വ്യവസായി മഹിമാനന്ദമിശ്രയ്ക്ക് ജാമ്യം അനുവദിച്ച ഹൈക്കോടതി ഉത്തരവ് റദ്ദാക്കിയാണ് സുപ്രീംകോടതി നിരീക്ഷണം. അന്വേഷണഘട്ടത്തില്‍ ന്യായാന്യായം വിശകലനം ചെയ്ത് ജാമ്യം അനുവദിച്ചാല്‍ അത് കേസിന്റെ ഭാവിയെത്തന്നെ പ്രതികൂലമായി ബാധിക്കും.