സിക്കിമിലെ ആദ്യ വിമാനത്താവളം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. പക്‌യോംഗ് വിമാനത്താവളമാണ് പ്രധാനമന്ത്രി ഉദ്ഘാടനം ചെയ്തത്. കേന്ദ്രമന്ത്രി സുരേഷ് പ്രഭു, മുഖ്യമന്ത്രി പി.കെ. ചാംലിംഗ് എന്നിവര്‍ ചടങ്ങില്‍ പങ്കെടുത്തു. പക്‌യോംഗ് വിമാനത്താവളം സംസ്ഥാനത്തിനു വലിയ മുതല്‍ക്കൂട്ടാകുമെന്നും മോദി പറഞ്ഞു. പക്‌യോംഗ് വിമാനത്താവളം തലസ്ഥാനമായ ഗാംഗ്‌ടോക്കില്‍ നിന്നും 30 കിലോമീറ്റര്‍ അകലെയാണ് സ്ഥിതി ചെയ്യുന്നത്. 201 ഏക്കറിലുള്ള വിമാനത്താവളം സമുദ്രനിരപ്പില്‍ നിന്നും 4,500 അടി മുകളിലാണ് സ്ഥിതി ചെയ്യുന്നത്.
നിലവില്‍ പശ്ചിമബംഗാളിലെ ബഗ്‌ഡോഗ്രയിലുള്ള വിമാനത്താവളത്തെയാണ് സിക്കിം ആശ്രയിക്കുന്നത്. സിക്കിമില്‍നിന്നു 124 കിലോമീറ്റര്‍ അകലെയാണ് ബഗ്‌ഡോഗ്ര വിമാനത്താവളം. 605 കോടി രൂപയാണ് വിമാനത്താവളത്തിനായി ചെലവഴിച്ചിരിക്കുന്നത്. വടക്ക് കിഴക്കന്‍ സംസ്ഥാനങ്ങളിലെ ആദ്യ ഗ്രീന്‍ഫീല്‍ഡ് വിമാനത്താവളം കൂടിയാണ് പക്‌യോംഗ്. രാജ്യത്തെ നൂറാമത് വിമാനത്താവളമാണ് ഇത്.