മുകേഷ്‌ അംബാനിക്ക്‌ ഇസെഡ്‌ സുരക്ഷ: ഇനി മുതല്‍ മുകേഷിന്റെ യാത്ര സായുധ സുരക്ഷാ ഉദ്യോഗസ്ഥരുടെ അകമ്പടിയോടെ
റിലയന്‍സ്‌ ഇന്‍ഡസ്‌ട്രീസ്‌ ചെയര്‍മാന്‍ മുകേഷ്‌ അംബാനിക്ക്‌ ഇസെഡ്‌ കാറ്റഗറി സുരക്ഷ. തീവ്രവാദി സംഘടനയായ ഇന്ത്യന്‍ മുജാഹിദീന്റെ ഭീഷണി കത്ത്‌ ലഭിച്ച പശ്ചാത്തലത്തിലാണ്‌ സുരക്ഷ. മുകേഷിന്റെ സുരക്ഷാ ചുമതല സി.ആര്‍.പി.എഫിന്‌ നല്‍കിക്കൊണ്ട്‌ ആഭ്യന്തര മന്ത്രാലയം ഉത്തരവിറക്കി.
മുകേഷിന്റെ മുംബൈയിലുള്ള ഓഫീസിലെത്തി തീവ്രവാദികള്‍ നേരിട്ടാണ്‌ ഭീഷണിക്കത്ത്‌ കൈമാറിയത്‌. ഡാനിഷ്‌ എന്ന തീവ്രവാദിയെ മോചിപ്പിച്ചില്ലെങ്കില്‍ ദക്ഷിണ മുംബൈയിലെ ഓള്‍ട്ടാമൗണ്ടിലുള്ള അംബാനിയുടെ ആഡംബര വസതി ആക്രമിക്കുമെന്നായിരുന്നു കത്തിലെ ഉള്ളടക്കം. തുടര്‍ന്ന്‌ വസതിയില്‍ പോലീസ് എയിഡ്‌ പോസ്‌റ്റ്‌ അനുവദിക്കണമെന്ന്‌ അംബാനി ആവശ്യപ്പെട്ടിരുന്നു. എന്നാല്‍ കത്തില്‍ മുജാഹിദീന്റെ ചിഹ്നങ്ങളൊന്നും ഉണ്ടായിരുന്നില്ല. ഡാനിഷ്‌ എന്നയാള്‍ ആരാണെന്നും വ്യക്തമല്ല.
ഇസെഡ്‌ കാറ്റഗറി സുരക്ഷ ലഭിക്കുന്നതോടെ അംബാനിക്ക്‌ പൈലറ്റ്‌ വാഹനവും എസ്‌കോര്‍ട്ട്‌ വാഹവും ലഭിക്കും. ഇവരുടെ പക്കല്‍ അത്യാധുനിക ആയുധങ്ങളുമുണ്ടായിരിക്കും. അംബാനിയുടെ സുരക്ഷയ്‌ക്കു മാത്രമായി ഒരു ഡസനോളം കമാന്‍ഡോകള്‍ വേണ്ടിവരും. ഇന്റലിജന്‍സ്‌ ബ്യൂറോയുടെ നിര്‍ദേശം കൂടി കണക്കിലെടുത്താണ്‌ കേന്ദ്ര ആഭ്യന്തര മന്ത്രാലയത്തിന്റെ നീക്കം. ഒരു സ്വകാര്യ വ്യക്തിക്ക്‌ സി.ആര്‍.പി.എഫ്‌ സുരക്ഷ നല്‍കുന്നത്‌ ആദ്യമായിട്ടാണ്‌.
https://www.facebook.com/Malayalivartha
