അധ്യക്ഷ സ്ഥാനത്തു നിന്ന് പി.സി.ചാക്കോയെ മാറ്റണമെന്നാവശ്യപ്പെട്ട് ജെ.പി.സി സമിതിയംഗങ്ങളുടെ നോട്ടീസ്
ടുജി സ്‌പെക്‌ട്രം അഴിമതി അന്വേഷിക്കുന്ന സംയുക്ത പാര്‍ലമെന്ററി സമിതി ചെയര്‍മാന്‍ പിസി ചാക്കോയ്‌ക്കെതിരെ ജെ.പി.സിയിലെ പ്രതിപക്ഷാംഗങ്ങള്‍. പക്ഷപാതിയായി പെരുമാറുന്ന പി.സി ചാക്കോയെ നീക്കണമെന്നാണ്‌ ഇവരുടെ ആവശ്യം. ഇക്കാര്യം ആവശ്യപ്പെട്ട്‌ ലോക്‌സഭാ സ്‌പീക്കര്‍ മീരാകുമാറിന്‌ ഇവര്‍ മെമ്മോറാണ്ടം നല്‍കി. 30 അംഗ ജെ.പി.സി.യി.ലെ 15 അംഗങ്ങള്‍ ഒപ്പിട്ട കത്താണ്‌ സ്‌പീക്കര്‍ക്ക്‌ നല്‍കിയിരിക്കുന്നത്‌. ബിജെപിയെ കൂടാതെ ജെഡി (യു), ഡിഎംകെ, ബിജെഡി, ഇടത്‌, തൃണമൂല്‍ അംഗങ്ങള്‍ കത്തില്‍ ഒപ്പിട്ടിട്ടുണ്ട്‌.
ഇതിനിടെ ഇന്ന്‌ ചേരാനിരുന്ന സമിതിയോഗം മാറ്റിവെച്ചു. തൃണമൂല്‍ എം.പി അംബികാ ബാനര്‍ജിയുടെ മരണത്തെ തുടര്‍ന്നാണ്‌ യോഗം മാറ്റിവെച്ചത്‌. എന്നാല്‍ സമിതി വീണ്ടും എന്നുചേരുമെന്ന കാര്യം നിശ്ചയിച്ചിട്ടില്ല. റിപ്പോര്‍ട്ട്‌ പാസാക്കാന്‍ അനുവദിക്കില്ലെന്ന നിലപാടിലാണ്‌ പ്രതിപക്ഷം. പ്രധാനമന്ത്രിക്കും അന്ന്‌ ധനമന്ത്രിയായിരുന്ന പി.ചിദംബരത്തിനും ക്ലീന്‍ ചീട്ട്‌ നല്‍കിയ റിപ്പോര്‍ട്ട്‌ അംഗീകരിക്കാന്‍ കഴിയില്ലെന്നാണ്‌ പ്രതിപക്ഷത്തിന്റെ നിലപാട്‌. എന്നാല്‍ വിയോജിപ്പുള്ളവര്‍ അക്കാര്യം രേഖപ്പെടുത്തി. വോട്ടെടുപ്പില്ലാതെ റിപ്പോര്‍ട്ട്‌ പാസാക്കണമെന്നാണ്‌ പിസി ചാക്കോ അഭ്യര്‍ഥിച്ചിരിക്കുന്നത്‌. റിപ്പോര്‍ട്ട്‌ പാര്‍ലമെന്റില്‍ വയ്‌ക്കുമെന്നും അദ്ദേഹം വിശ്വാസം പ്രകടിപ്പിച്ചു.
https://www.facebook.com/Malayalivartha
