ഉത്തര്‍ പ്രദേശ്‌ മന്ത്രി അസംഖാനെ അമേരിക്കന്‍ വീമാനത്താവളത്തില്‍ ചോദ്യം ചെയ്‌തു
ഉത്തര്‍പ്രദേശ്‌ മന്ത്രിയും സമാജ്‌ വാദി പാര്‍ട്ടി നേതാവുമായ അസംഖാനെ അമേരിക്കന്‍ വീമാനത്താവളത്തില്‍ കസ്റ്റഡിയിലെടുത്ത്‌ ചോദ്യം ചെയ്‌ത ശേഷം വിട്ടയച്ചു. ബോസ്‌റ്റണിലെ ലോഗന്‍ അന്താരാഷ്ട്ര വീമാനത്താവളത്തില്‍ നിന്ന് കസ്‌റ്റഡിയിലെടുത്ത അസംഖാനെ പത്തുമിനിറ്റു നേരം ചോദ്യം ചെയ്‌തു. ഉത്തര്‍പ്രദേശ്‌ മുഖ്യമന്ത്രി അഖിലേഷ്‌ യാദവിനൊപ്പം ഹാര്‍വാര്‍ഡ്‌ യൂണിവേഴ്‌സിറ്റിയില്‍ പ്രഭാഷണം നടത്താന്‍ എത്തിയതായിരുന്നു അദ്ദേഹം. താനൊരു മുസ്ലീമായതു കൊണ്ടാണ്‌ ഇത്തരത്തില്‍ അപമാനിതനാകാണ്ടി വന്നതെന്ന്‌ അസംഖാന്‍ പറഞ്ഞു. തന്നെ ചോദ്യം ചെയ്‌ത ഉദ്യോഗസ്ഥക്കെതിരെ നടപടി വേണമെന്നും അദ്ദേഹം ആവശ്യപ്പെട്ടു. എന്നാല്‍ അമേരിക്കന്‍ ആഭ്യന്തര വകുപ്പിന്റെ നിര്‍ദേശ പ്രകാരം തന്നില്‍ നിക്ഷിപ്‌തമായ ജോലി ചെയ്യുകയായിരുന്നു എന്നാണ്‌ സുരക്ഷാ ഉദ്യോഗസ്ഥയുടെ വിശദീകരണം. തന്റെ ജോലി തടസ്സപ്പെടുത്തിയതിനും, മോശമായി പെരുമാറിയതിനും അവര്‍ പരാതി നല്‍കുമെന്ന്‌ അറിയിച്ചിട്ടുണ്ട്‌. ബോസ്‌റ്റണ്‍ സ്‌ഫോടനത്തിന്റെ പശ്ചാത്തലത്തില്‍ അമേരിക്കയില്‍ വന്‍ സുരക്ഷാ ക്രമീകരണമാണ്‌ ഒരുക്കിയിരിക്കുന്നത്‌. മുന്‍ രാഷ്ട്രപതി എ.പി.ജെ അബ്ദുള്‍ കലാമിനും, ബോളിവുഡ്‌ താരം ഷാരൂഖ്‌ ഖാനും ഇത്തരത്തിലുള്ള അനുഭവം മുന്‍പ്‌ നേരിടേണ്ടി വന്നിട്ടുണ്ട്‌.
https://www.facebook.com/Malayalivartha
