അശ്വിനി കുമാര്‍ തുലാസില്‍: കൂടെ കേന്ദ്രസര്‍ക്കാരും: കല്‍ക്കരി അഴിമതി ഇന്ന്‌ സുപ്രീം കോടതിയില്‍
യു.പി എ സര്‍ക്കാരിന്‌ ഇന്ന്‌ നിര്‍ണ്ണായക ദിനം. കല്‍ക്കരിപ്പാടം അഴിമതികേസ്‌ ഇന്ന്‌ സുപ്രീം കോടതി പരിഗണിക്കും. ഈ കേസില്‍ സി.ബി.ഐ റിപ്പോര്‍ട്ട്‌ നിയമമന്ത്രി പരിശോധിച്ചു എന്ന സത്യവാങ്‌മൂലം ജസ്റ്റിസ് ആര്‍.എം ലോധയുടെ നേതൃത്വത്തിലുള്ള ബെഞ്ചാണ്‌ പരിഗണിക്കുക. കല്‍ക്കരി ഇടപാട്‌ സംബന്ധിച്ചു സുപ്രീംകോടതിയില്‍ സമര്‍പ്പിച്ച തത്‌സ്ഥിതി റിപ്പോര്‍ട്ട്‌ രാഷ്‌ട്രീയ ഭരണ നേതൃത്വത്തിന്റെ ആവശ്യപ്രകാരം അവരുമായി പങ്കുവച്ചിരുന്നതായാണു സിബിഐ ഡയറക്ടര്‍ സമര്‍പ്പിച്ച സത്യവാങ്‌മൂലത്തില്‍ വ്യക്തമാക്കിയിരിക്കുന്നത്‌. രണ്ടാം സ്റ്റാറ്റസ്‌ റിപ്പോര്‍ട്ടിന്റെ അനുബന്ധമായി സമര്‍പ്പിച്ച രേഖയില്‍, നിയമമന്ത്രി അശ്വനികുമാറും പ്രധാനമന്ത്രിയുടെ ഓഫീസിലെയും കല്‍ക്കരി മന്ത്രാലയത്തിലെയും ജോയിന്റ്‌ സെക്രട്ടറിമാരും വരുത്തിയ തിരുത്തലുകള്‍ വിശദീകരിക്കുന്നു. സര്‍ക്കാരിന്റെ വീഴ്‌ചകള്‍ അക്കമിട്ടു നിരത്തിയ ആദ്യ റിപ്പോര്‍ട്ടില്‍ ഇവര്‍ 15 മുതല്‍ 20 ശതമാനം വരെ മാറ്റം വരുത്തിയെന്നു റിപ്പോര്‍ട്ടില്‍ സിബിഐ വ്യക്തമാക്കിയിരിക്കുന്നതെന്നാണ്‌ സൂചന. വിഷയത്തില്‍ നിയമമന്ത്രിക്കും, പ്രധാനമന്ത്രിയുടെ ഓഫീസിനും എതിരെ കടുത്ത വിമര്‍ശനം കോടതി നടത്തിയാല്‍ കേന്ദ്രമന്ത്രി സഭ വന്‍ പ്രതിസന്ധിയിലേക്ക്‌ കൂപ്പുകുത്തും എന്ന് ഉറപ്പാണ്‌.
ഇത് കണക്കിലെടുത്ത്‌ ബജറ്റ്‌ പാസാക്കലിന്റെ എല്ലാ നടപടികളും ചര്‍ച്ചയില്ലാതെ ചൊവ്വാഴ്‌ച തന്നെ പൂര്‍ത്തിയാക്കാന്‍ സര്‍ക്കാര്‍ തീരുമാനിച്ചു. നേരത്തെ ധനാഭ്യര്‍ത്ഥനകള്‍ ഏപ്രില്‍ മുപ്പതിനും ധനകാര്യബില്ല്‌ മെയ്‌ ഏഴിനും പാസാക്കാനായിരുന്നു തീരുമാനിച്ചിരുന്നത്‌. പാര്‍ലമെന്റിന്റെ ചരിത്രത്തില്‍ ആദ്യമായാണ്‌ ഇവയെല്ലാം ചര്‍ച്ചയില്ലാതെ ഒരു ദിവസംകൊണ്ട്‌ പാസാക്കുന്നത്‌. സ്‌പീക്കര്‍ മീരാകുമാറിന്റെ അഭ്യര്‍ത്ഥന പ്രകാരമാണ്‌ ബജറ്റുമായി ബന്ധപ്പെട്ട നടപടികള്‍ പൂര്‍ത്തിയാക്കാന്‍ സഹകരിക്കാമെന്ന്‌ പ്രതിപക്ഷ കക്ഷികള്‍ സമ്മതിച്ചത്‌. ഏന്നാല്‍ ബി.ജെ.പി സഭ ബഹിഷ്‌കരിക്കും. ഇതിനിടെ സുപ്രീംകോടതിയില്‍ കേന്ദ്രസര്‍ക്കാരിന്റെ നിലപാട്‌ സ്വീകരിക്കുന്നത്‌ സംബന്ധിച്ച് പ്രധാനമന്ത്രി മന്‍മോഹന്‍ സിംഗ്‌, അറ്റോര്‍ണി ജനറല്‍ ജി.ഇ. വഹന്‍വതിയുമായി കൂടിക്കാഴ്‌ച നടത്തി.
എന്തായാലും കോടതിയില്‍ നിന്ന് പ്രതികൂലമായ പരാമര്‍ശമുണ്ടായാല്‍ നിയമമന്ത്രി അശ്വിനി കുമാറിന്‌ രാജിവെക്കേണ്ടി വരുമെന്ന്‌ ഉറപ്പാണ്‌. സി.ബി.ഐ സത്യവാങ്‌മൂലം പുറത്തു വന്നതുമുതല്‍ പ്രതിപക്ഷം പ്രധാനമന്ത്രിയുടെ രാജിക്കായ്‌ മുറവിളി കൂട്ടിയിരുന്നു. എന്നാല്‍ രാജിവെക്കാന്‍ തയ്യാറല്ലെന്നാണ്‌ പ്രധാനമന്ത്രി അറിയിച്ചത്‌. വലിയ ആകാംക്ഷയോടെയാണ്‌ ദേശീയ രാഷ്ട്രീയം കോടതി നടപടികള്‍ നോക്കികാണുന്നത്‌.
https://www.facebook.com/Malayalivartha
