മാനഭംഗത്തില്‍ നിന്നും രാജ്യ തലസ്ഥാനത്തെ മാറ്റിയെടുക്കാന്‍ ശ്രമം, ആദ്യ പടിയായി ഡല്‍ഹി കമ്മീഷണറെ മാറ്റി മുഖം മിനുക്കുന്നു
മാനഭംഗക്കേസുകള്‍ വല്ലാതെ കൂടുന്നത്‌ ഡല്‍ഹി പോലീസിന്റെ വിശ്വാസ്യത പോലും നഷ്‌ടമായി. കൂടാതെ ക്രമസമാധാന പ്രശ്‌നങ്ങളില്‍ പോലീസ്‌ കൈക്കൊണ്ട നിലപാടുകളും ഏറെ വിമര്‍ശനം നേടിയിരുന്നു. ഈയൊരു സാഹചര്യത്തിലാണ്‌ ഡല്‍ഹി പോലീസ്‌ കമ്മീഷണര്‍ നീരജ്‌ കുമാറിനെ മാറ്റാനായി സര്‍ക്കാര്‍ ആലോചിക്കുന്നത്‌. മിക്ക പീഡന കേസുകളിലും പോലീസിന്റെ ഭാഗത്തുനിന്നുണ്ടായ വീഴ്‌ചകള്‍ ഏറെ ചര്‍ച്ചചെയ്യപ്പെട്ടിരുന്നു. അഞ്ച് വയസുള്ള പെണ്‍കുട്ടി പീഡിപ്പിക്കപ്പെട്ടപ്പോള്‍ കമ്മീഷണറുടെ രാജിക്കായി പലരും മുറവിളിച്ചു. എന്നാല്‍ കമ്മീഷണര്‍ മാറിയാല്‍ പീഡനം നിലയ്‌ക്കുമോയെന്ന്‌ ചോദിച്ച്‌ അദ്ദേഹംതന്നെ തള്ളിക്കളഞ്ഞു. അപ്പോഴാണ്‌ വീണ്ടും പീഡനങ്ങള്‍ തലസ്ഥാനത്ത്‌ നടന്നത്‌.
സാധരണക്കാരുടെ മനസില്‍ ഡല്‍ഹി ഇന്നൊരു പേടിസ്വപ്‌നമാണ്‌. ലോകത്തുള്ളവര്‍ക്ക്‌, വിശേഷിച്ച്‌ സ്‌ത്രീകള്‍ക്ക്‌ പൊതുവേ ഇപ്പോള്‍ ഡല്‍ഹിയില്‍ വരാന്‍ പോലും പേടിയാണ്‌. പീഡനത്തിന്‌ ഇപ്പോള്‍ പ്രായവുമില്ല. ജനിച്ച്‌ കഴിഞ്ഞാല്‍ വയസ്‌ ഒരു പ്രശ്‌നമേ അല്ലാതായി മാറിയിരിക്കുന്നു. പെണ്‍കുട്ടികള്‍ക്കും സ്‌ത്രീകള്‍ക്കും ഒരു സുരക്ഷയും ഇല്ലാത്ത നഗരമായി മാറിയിരിക്കുകയാണ്‌ ഈ പുതു ഡല്‍ഹി. ഇവിടെ സ്‌നേഹമോ കടപ്പാടോ ദയയോ സഹാനുഭൂതിയോ ഒന്നുമില്ല. ഡല്‍ഹിയില്‍ ആകെ സുരക്ഷയുള്ളത്‌ സോണിയാഗാന്ധിക്കും ഡല്‍ഹി മുഖ്യമന്ത്രി ഷീലാ ദീക്ഷിത്തിനും മാത്രമാണെന്നാണ്‌ ഒരു വലിയ വിഭാഗത്തിന്റെ വിശ്വാസം.
ഇതെല്ലാം കേന്ദ്ര-സംസ്ഥാന സര്‍ക്കാരുകളെ ഒരു പോലെ ബാധിക്കുമെന്നതിനാല്‍ എത്രയും പെട്ടന്ന്‌ ഡല്‍ഹിയുടെ മുഖം മിനുക്കാനുള്ള ശ്രമത്തിലാണ്‌ ഡല്‍ഹി സര്‍ക്കാര്‍.
https://www.facebook.com/Malayalivartha
