പ്രതീക്ഷകള്‍ മാത്രം ബാക്കി, സരബ്ജിത് സിങ്ങിന്റെ ആരോഗ്യനില കൂടുതല്‍ മോശമായി
പാകിസ്താനിലെ ആസ്പത്രിയില്‍ അബോധാവസ്ഥയില്‍ കഴിയുന്ന സരബ്ജിത് സിങ്ങിന്റെ ആരോഗ്യനില കൂടുതല്‍ മോശമായതായി ഡോക്ടര്മാര് അറിയിച്ചു. എന്നാല്‍, മസ്തിഷ്ക മരണം സംഭവിച്ചിട്ടില്ലെന്ന് അദ്ദേഹത്തെ ചികിത്സിക്കുന്ന മെഡിക്കല്‍ സംഘത്തിന്റെ തലവന്‍ ഡോ.മുഹമ്മദ്‌ ഷൗക്കത്ത് പറഞ്ഞു. വീണ്ടും സി.ടി. സ്‌കാന്‍ ക്കചെയ്‌തെങ്കിലും പുരോഗതിയുടെ സൂചനകാണുന്നില്ലെന്ന് ഷൗക്കത്ത് പറഞ്ഞു.
സഹതടവുകാരുടെ ക്രൂരമര്‍ദ്ദനത്തില്‍ ഗുരുതരാവസ്ഥയില്‍ ലാഹോറിലെ ജിന്ന ആശുപത്രിയില്‍ കഴിയുന്ന സരബ്ജിത് സിംഗിന്‌ മസ്തിഷ്ക മരണം സംഭവിച്ചതായി റിപ്പോര്‍ട്ടുകള്‍ പറഞ്ഞിരുന്നു. സഹ തടവുകാരുടെ മര്‍ദ്ദനത്തില്‍ സരബ്‌ജിത്തിന്റെ തലയോട്ടിക്ക്‌ ഗുരുതരമായ പരിക്കേറ്റിരുന്നു.
സരബ്ജിത് സിംഗിനെ വിദഗ്‌ദ്ധ ചികിത്സയ്‌ക്കായ്‌ വിദേശത്തേയ്‌ക്ക്‌ കൊണ്ടുപോകേണ്ടതില്ലെന്ന്‌ ഇന്നലെ വിദഗ്‌ദ്ധ സമിതി അഭിപ്രായപ്പെട്ടിരുന്നു.
ഗുരുതരാവസ്ഥയില്‍ കഴിയുന്ന അദ്ദേഹത്തെ അവിടെന്ന്‌ മാറ്റണ്ട എന്നാണ്‌ പൊതുവേയുള്ള പാകിസ്ഥാന്റെ അഭിപ്രായം. ഇവിടെ മികച്ച ചികിത്സയാണ്‌ സരബ്‌ജിത്തിനായി ഒരുക്കിയിരിക്കുന്നതെന്നും ഡോക്ടര്മാര് പറഞ്ഞിരുന്നു.
സരബ്ജിത് രക്ഷപ്പെടാനുള്ള സാധ്യത കുറവാണെന്ന്‌ ആശുപത്രി അധികൃതര്‍ നേരത്തേ തന്നെ പറഞ്ഞിരുന്നു. അതീവ ഗുരുതരാവസ്ഥയില്‍ കഴിയുന്ന സരബ്ജിത് സിംഗിനെ ചികിത്സയ്‌ക്കായി ഇന്ത്യയിലേക്ക്‌ അയക്കണമെന്ന്‌ കുടുംബാംഗങ്ങള്‍ പാകിസ്ഥാന്‍ സര്‍ക്കാരിനോട്‌ ആവശ്യപ്പെട്ടിരുന്നു. മാനുഷിക പരിഗണന കാട്ടി സരബ്‌ജിത്തിനെ ഇന്ത്യയിലേക്കയക്കണമെന്ന്‌ ഇന്ത്യയും ആവശ്യപ്പെട്ടിരുന്നു. എല്ലാ ചികിത്സയും ഇന്ത്യ നോക്കാമെന്നും പറഞ്ഞിരുന്നു. എന്നാല്‍ പാകിസ്ഥാന്‍ അതിനൊന്നും പ്രതികരിച്ചില്ല. ഇതിനിടെ സരബ്‌ജിത്തിന്റെ ആരോഗ്യകാര്യങ്ങള്‍ ചര്‍ച്ചചെയ്യാനായി സരബിജിത്തിന്റെ സഹോദരി ഇന്ത്യയിലേക്ക്‌ തിരിച്ചിട്ടുണ്ട്‌.
https://www.facebook.com/Malayalivartha
