സനാവുള്ളയെ പാക് ഉദ്യോഗസ്ഥര് സന്ദര്ശിച്ചു: വിദഗ്ദ ചികിത്സക്കായി വിട്ടു തരണമെന്ന് ആവശ്യം
ജമ്മു കാശ്മീര് ജയിലില് സഹതടവുകാരന്റെ മര്ദ്ദനത്തെ തുടര്ന്ന് ഗുരുതരാവസ്ഥയില് കഴിയുന്ന പാക് തടവുകാരന് സനാവുള്ള ഖാനെ പാക് ഹൈക്കമ്മീഷന് ഉദ്യോഗസ്ഥര് സന്ദര്ശിച്ചു. രാവിലെ ചണ്ഡിഗഢ് ആശുപത്രിയിലെത്തിയാണ് പാക് ഹൈക്കമ്മീഷന് ഉദ്യോഗസ്ഥര് സനാവുള്ളയെ സന്ദര്ശിച്ചത്. ഇയാളുടെ ആരോഗ്യനില മോശമായതിനാല് വിദഗ്ദ ചികില്സക്കായി വിട്ടു തരണമെന്ന് പാക്കിസ്ഥാന് ഇന്ത്യയോട് ആവശ്യപ്പെട്ടു.
പുലര്ച്ചെ 3.30 ഓടെയായിരുന്നു ഹൈക്കമ്മീഷന് ഉദ്യോഗസ്ഥര് ആശുപത്രിയിലെത്തിയത്. സനാവുള്ളയെ ചികിത്സിക്കുന്ന ഡോക്ടര്മാരുമായും ഇവര് ആശയവിനിമയം നടത്തി. ഇന്നലെ തന്നെ പാക് കോണ്സല് ഉദ്യോഗസ്ഥര്ക്ക് സനാവുള്ളയെ സന്ദര്ശിക്കാന് ഇന്ത്യ അനുമതി നല്കിയിരുന്നു.
ഭീകരപ്രവര്ത്തനം നടത്തിയതിനാണ് 1999 ല് ടാഡ നിയമപ്രകാരം സനവുള്ള (52) അറസ്റ്റിലായിരുന്നത്. പാക്കിസ്ഥാനിലെ സിയാല്കോട്ട് സ്വദേശിയായ ഇയാള് ജീവപര്യന്തം ശിക്ഷ അനുഭവിച്ചുവരികയായിരുന്നു. ഇതേ ജയിലില് തടവുകാരനായിരുന്ന മുന് ഇന്ത്യന് സൈനികന് വിനോദ് കുമാര് കോടാലി കൊണ്ട് ആക്രമിക്കുകയായിരുന്നു.
വിനോദ് കുമാറിന്റെ ആക്രമണത്തില് തലയ്ക്ക് ഗുരുതരമായി പരിക്കേറ്റ സനാവുള്ളയെ വിദഗ്ധ ചികിത്സയ്ക്കായി വിമാനമാര്ഗം ഇന്നലെ വൈകിട്ടാണ് ചണ്ഡിഗഢിലേക്ക് മാറ്റിയത്.
https://www.facebook.com/Malayalivartha