ഇന്ത്യയുടെ ശക്തമായ ഇടപെടലിനെത്തുടര്‍ന്ന്‌ അവസാനം ചൈന അതിര്‍ത്തി കടന്നു. അതോടെ ഇന്ത്യന്‍ സൈന്യവും പിന്മാറി.

ലഡാക്കിന് സമീപമുള്ള ദൗലത് ബെഗ് ഓള്‍ഡിയില്‍ നിലയുറപ്പിച്ചിരുന്ന ഇന്ത്യയുടെയും ചൈനയുടെയും സൈനികര്‍ പിന്മാറി. സൈനികരുടെ പിന്മാറ്റം ഞായറാഴ്ച രാത്രി 7.30 ഓടെ പൂര്‍ത്തിയായി. ഇരുരാജ്യങ്ങളുടെയും പ്രതിനിധികള്‍ പങ്കെടുത്ത ഉന്നതതല യോഗത്തില്‍ ഉണ്ടായ ധാരണയെ തുടര്‍ന്നാണ് സൈനികര്‍ പിന്മാറിയത്. ലഡാക്കിന് സമീപമുള്ള ദെപ്‌സാങ് താഴ്‌വരയില്‍ ഇന്ത്യയുടെ ഭൂഭാഗത്ത് 10 കിലോമീറ്റര്‍ ഉള്ളില്‍ക്കടന്ന് ചൈന പോസ്റ്റ് സ്ഥാപിച്ചതിനെ തുടര്‍ന്ന് ഉണ്ടായ പ്രശ്‌നങ്ങള്‍ക്കാണ് ഇതോടെ പരിഹാരമായത്.

കഴിഞ്ഞ 15നാണ് ചൈനയുടെ പ്ലാറ്റൂണ്‍ ലഡാക്കിന് സമീപം ഇന്ത്യന്‍ ഭൂപ്രദേശത്ത് കടന്നുകയറിയത്. ഇതേത്തുടര്‍ന്ന് പ്രദേശം ഉള്‍പ്പെടുന്ന ദൗലത് ബെഗ് ഓള്‍ഡി മേഖലയിലേക്ക് ഇന്ത്യ കരസേനയുടെ ഇന്‍ഫന്‍ററി റെജിമെന്‍റിനെ അയച്ചിരുന്നു. പ്രദേശത്ത് ഇന്ത്യന്‍ സൈന്യം പോസ്റ്റ് സ്ഥാപിക്കുകയും ചെയ്തു. 15ന് രാത്രിതന്നെ, രണ്ട് ചൈനീസ് ഹെലികോപ്റ്ററുകള്‍ ഇന്ത്യന്‍ ഭാഗത്ത് തമ്പടിച്ച ചൈനീസ് പട്ടാളക്കാര്‍ക്ക് ആഹാരവും മറ്റുമായി എത്തിയെന്ന കാര്യവും സ്ഥിരീകരിക്കപ്പെട്ടിരുന്നു.

ഇരുരാജ്യങ്ങള്‍ക്കുമിടയിലുള്ള നിയന്ത്രണരേഖ ചൈനയുടെ സൈനികര്‍ ഇടയ്ക്കിടെ മുറിച്ചുകടക്കാറുണ്ടെങ്കിലും ഇത്തവണത്തെ കൈയേറ്റത്തോട് സാമാന്യം ശക്തമായ രീതിയില്‍ത്തന്നെയാണ് ഇന്ത്യ പ്രതികരിച്ചത്. ഇന്ത്യയും ചൈനയുമായുള്ള ബന്ധത്തില്‍ വിള്ളലുകള്‍ ഉണ്ടാക്കാനേ ഇത്തരം സംഭവങ്ങള്‍ ഉതകൂ എന്ന് ഇന്ത്യ ചൈനയെ അറിയിച്ചിരുന്നു. ഇരുഭാഗത്തെയും ബ്രിഗേഡിയര്‍തലത്തിലുള്ള സൈനിക കമാന്‍ഡര്‍മാര്‍ കൂടിക്കാഴ്ച നടത്തിയിരുന്നെങ്കിലും പ്രശ്‌നം പരിഹരിക്കാനായില്ല. രണ്ടാം ഫ് ളാഗ് മീറ്റിങ്ങിന് ചൈന ആദ്യം വിസമ്മതിച്ചെങ്കിലും പിന്നീട് വഴങ്ങി.