അശ്ലീല ചിത്രം കണ്ട് ഒമ്പത് വയസുകാരിയെ ബലാത്സംഗം ചെയ്ത് കൊലപ്പെടുത്തിയ സംഭവത്തില്‍ 13കാരനും അമ്മയ്ക്കും സഹോദരങ്ങള്‍ക്കുമെതിരെ കേസ്. ഏപ്രില്‍ 24 നാണ് മധ്യപ്രദേശിലെ രേവയില്‍ കേസിനാസ്പദമായ സംഭവം നടന്നത്. ഫോണില്‍ അശ്ലീല ചിത്രം കണ്ട 13കാരന്‍ സഹോദരിയെ ബലാത്സംഗം ചെയ്യുകയും പിന്നാലെ കൊലപ്പെടുത്തുകയുമായിരുന്നു എന്നാണ് റിപോര്‍ട്ടുകള്‍. എന്നാല്‍ കുറ്റകൃത്യം മറച്ചുവെക്കാന്‍ അമ്മയും രണ്ട് സഹോദരിമാരും സഹായിച്ചതായാണ് റിപ്പോര്‍ട്ട്.

ഒമ്പതുകാരിയുടെ മൃതദേഹം കണ്ടെത്തിയത് വീടിന്റെ പരിസരത്തുനിന്നാണ്. മരണം കൊലപാതകമാണെന്നും ബലാത്സംഗത്തിന് വിധേയയായെന്നുമുള്ള പോസ്റ്റ്മോര്‍ട്ടം റിപ്പോര്‍ട്ടാണ് കേസില്‍ നിര്‍ണായകമായത്. പെണ്‍കുട്ടിയെ ബലാത്സംഗം ചെയ്ത ശേഷം സഹോദരന്‍ തന്നെ കഴുത്തു ഞെരിച്ച് കൊലപ്പെടുത്തുകയായിരുന്നുവെന്നാണ് പൊലീസിന്റെ വിശദീകരണം. കേസ് വഴിതിരിച്ചുവിടാന്‍ സഹോദരിമാരും അമ്മയും ശ്രമിച്ചതായും പൊലീസ് അറിയിച്ചു. എന്നാല്‍ ഇവരെ തുടര്‍ച്ചയായി ചോദ്യം ചെയ്തതിനു പിന്നാലെയാണ് പൊലീസിന് നിര്‍ണായക വിവരം ലഭിച്ചത്.

അതേസമയസം ലൈംഗികാതിക്രമത്തെ കുറിച്ച് അച്ഛനോട് പറയുമെന്ന് പറഞ്ഞതോടെ സഹോദരന്‍ കുട്ടിയെ ശ്വാസം മുട്ടിച്ച് കൊലപ്പെടുത്താന്‍ ശ്രമിക്കുകയായിരുന്നു. പിന്നാലെ അമ്മയെ വിവരമറിയിച്ചു. കുട്ടി മരിച്ചില്ലെന്ന് അറിഞ്ഞതോടെ അമ്മയുടെ സഹായത്തോടെ വീണ്ടും കഴുത്തുഞെരിച്ച് മരണം ഉറപ്പാക്കുകയായിരുന്നു. തുടര്‍ന്ന് സഹോദരിമാര്‍കൂടി ചേര്‍ന്ന് തെളിവുകള്‍ നശിപ്പിച്ചെന്നുമാണ് പൊലീസ് റിപ്പോര്‍ട്ട്.കേസുമായി ബന്ധപ്പെട്ട് അമ്പത് പേരെയാണ് പൊലീസ് ചോദ്യം ചെയ്തത്. മൊഴിയില്‍ വൈരുദ്ധ്യം തോന്നിയതോടെ വിശദമായി ചോദ്യം ചെയ്തപ്പോഴാണ് പ്രതികള്‍ കുറ്റസമ്മതം നടത്തിയത് എന്നും പൊലീസ് വ്യക്തമാക്കുന്നുണ്ട്. ഇതിനുപിന്നാലെയാണ് പ്രതികളെ കസ്റ്റഡിയിലെടുത്തത്.