ജമ്മു കശ്മീരിലെ ലേയില്‍ ബസ് താഴ്ചയിലേക്ക് മറിഞ്ഞ് ഏഴ് പേര്‍ക്ക് ദാരുണാന്ത്യം. അപകടത്തില്‍ 20 പേര്‍ക്ക് പരിക്കേറ്റു. പരിക്കേറ്റവരെ ലേയിലെ ജില്ല ആശുപത്രിയിലും സൈനിക ആശുപത്രിയിലും പ്രവേശിപ്പിച്ചിരിക്കുകയാണ്.

ലഡാക്കിലെ ദുര്‍ബുക്കില്‍ വച്ച് ഇന്ന് ഉച്ചയോടെയായിരുന്നു അപകടം സംഭവിച്ചത്. പരിക്കേറ്റവരില്‍ ചിലരുടെ നില ഗുരുതരമാണ്. ലേയില്‍ നിന്ന് കിഴക്കന്‍ ലഡാക്കിലേക്ക് യാത്രക്കാരുമായി പോകുകയായിരുന്ന സ്‌കൂള്‍ ബസാണ് അപകടത്തില്‍പ്പെട്ടത്. 200 അടി താഴ്ചയിലേക്കാണ് ബസ് മറിഞ്ഞത്. പരിക്കേറ്റവരെ ഹെലികോപ്റ്റര്‍ മാര്‍ഗമാണ് ആശുപത്രികളില്‍ എത്തിച്ചത്.

ലേയിലെ ഒരു സ്‌കൂളിലെ ജീവനക്കാര്‍ കല്യാണചടങ്ങില്‍ പങ്കെടുക്കാനായി പോകവേയാണ് അപകടം സംഭവിച്ചത്.