അമരാവതിയില്‍ എത്തിയ കോണ്‍ഗ്രസ് നേതാവ് രാഹുല്‍ ഗാന്ധിയുടെ ബാഗ് പരിശോധിച്ച് തിരഞ്ഞെടുപ്പ് കമ്മീഷന്‍ ഉദ്യോഗസ്ഥര്‍
അമരാവതിയില്‍ എത്തിയ കോണ്‍ഗ്രസ് നേതാവ് രാഹുല്‍ ഗാന്ധിയുടെ ബാഗ് പരിശോധിച്ച് തിരഞ്ഞെടുപ്പ് കമ്മീഷന്‍ ഉദ്യോഗസ്ഥര്‍. മഹാരാഷ്ട്ര നിയമസഭാ തിരഞ്ഞെടുപ്പ് പ്രചാരണത്തിനായി അമരാവതിയില്‍ എത്തിയതായിരുന്നു രാഹുല്‍ ഗാന്ധി. ഇന്ത്യ മുന്നണി നേതാക്കള്‍ക്കെതിരെ മാത്രം തിരഞ്ഞെടുപ്പ് കമ്മീഷന്‍ നടപടി സ്വീകരിക്കുന്നുവെന്ന് ആരോപിച്ച് ബിജെപിയും പ്രതിപക്ഷ പാര്‍ട്ടികളും തമ്മില്‍ രാഷ്ട്രീയ തര്‍ക്കം തുടരുന്നതിനിടയിലാണ് സംഭവം.
പരിശോധനയുടെ വീഡിയോയില്‍ ഒരു സംഘം ഉദ്യോഗസ്ഥര്‍ രാഹുല്‍ ഗാന്ധിയുടെ ഹെലികോപ്റ്ററില്‍ തിരച്ചില്‍ നടത്തുന്നതും രാഹുല്‍ ഗാന്ധി സമീപത്ത് നില്‍ക്കുന്നതും കാണാം. പരിശോധന തുടര്‍ന്നപ്പോള്‍ രാഹുല്‍ ഗാന്ധി ഇറങ്ങിപ്പോയി പാര്‍ട്ടി നേതാക്കളുമായി സംസാരിക്കുന്നുണ്ട്.
ജാര്‍ഖണ്ഡില്‍ വെച്ച് രാഹുലിന്റെ ഹെലികോപ്റ്റര്‍ നിലത്തിറക്കിയതിനെതിരെ തിരഞ്ഞെടുപ്പ് കമ്മീഷനില്‍ കോണ്‍ഗ്രസ് പരാതി നല്‍കിയതിന് തൊട്ടുപിന്നാലെയാണ് ഈ ബാഗ് പരിശോധന.
രാഹുല്‍ ഗാന്ധിയുടെ ഹെലികോപ്റ്റര്‍ പറന്നുയരാന്‍ അനുവദിക്കാത്തത് മൂലം അദ്ദേഹത്തിന്റെ പൊതുയോഗങ്ങള്‍ വൈകുകയോ റദ്ദാക്കുകയോ ചെയ്യുന്നുവെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേശ് ആരോപിച്ചു.
പ്രധാനമന്ത്രി നരേന്ദ്ര മോദിക്കും ബി.ജെ.പി നേതാക്കള്‍ക്കും സമാനമായ പരിശോധനകള്‍ നടത്തുമോയെന്ന ചോദ്യവുമായി ശിവസേന (യുബിടി) നേതാവ് ഉദ്ധവ് താക്കറെ ഒരു വീഡിയോ പങ്കുവെച്ചതിന് പിന്നാലെയാണ് ഉന്നത രാഷ്ട്രീയ നേതാക്കളുടെ ബാഗുകള്‍ പരിശോധിച്ചത് വിവാദമായത്. പ്രതികരണമായി, ബിജെപി നേതാക്കള്‍ ഈ നീക്കത്തെ ന്യായീകരിച്ചു. ഇതിനെ സ്വതന്ത്രവും നീതിയുക്തവുമായ തിരഞ്ഞെടുപ്പ് ഉറപ്പാക്കാനുള്ള പതിവ് നടപടിയാണെന്ന് അവര്‍ വിശേഷിപ്പിച്ചു.
https://www.facebook.com/Malayalivartha
