ബെംഗളുരു-തുമക്കുരു ദേശീയപാതയില്‍ നെലമംഗലയില്‍ കാറിനു മുകളിലേക്ക് കണ്ടെയ്‌നര്‍ ലോറി മറിഞ്ഞ് ആറുപേര്‍ മരിച്ചു. മാതാപിതാക്കള്‍ക്കും മക്കള്‍ക്കുമാണ് ദാരുണാന്ത്യം സംഭവിച്ചത്. വ്യവസായിയായ വിജയനപുര സ്വദേശി ചന്ദ്രയാഗപ്പ, ഭാര്യ ഗൗരഭായ്, മക്കളായ ജോണ്‍, വിജയലക്ഷ്മി, ആര്യ, ദീക്ഷ എന്നിവരാണ് മരിച്ചത്. ശനിയാഴ്ച രാവിലെ പതിനൊന്നു മണിയോടെയായിരുന്നു അപകടം.

വളരെ തിരക്കേറിയ ബെംഗളുരു-തുമക്കുരു ആറുവരി ദേശീയപാതയിലൂടെ അപകടത്തില്‍ ഇരുവാഹനങ്ങളും ഒരേ ദിശയില്‍ സഞ്ചരിക്കുകയായിരുന്നു. കണ്ടെയ്‌നര്‍ ലോറി മറ്റൊരു ലോറിയുമായി കൂട്ടിയിടിച്ച് നിയന്ത്രണം വിട്ട് കാറിന് മുകളിലേക്ക് മറിയുകയായിരുന്നു. കാറിനകത്തുണ്ടായിരുന്നവര്‍ തല്‍ക്ഷണം മരിച്ചു. ക്രെയിന്‍ എത്തിച്ച് കാറിനുമുകളില്‍നിന്നു കണ്ടെയ്‌നര്‍ മാറ്റിയത് ഏറെ സഹാസപ്പെട്ടാണ്. തുടര്‍ന്ന് കാറിനുള്ളില്‍ നിന്ന് അപകടത്തില്‍ പെട്ടവരെ പുറത്തെടുത്ത് ആശുപത്രിയിലെത്തിച്ചെങ്കിലും മരണം സ്ഥിരീകരിച്ചു.

ക്രിസ്മസ്, പുതുവത്സര ആഘോഷങ്ങള്‍ക്കായി വിജയപുരയിലേക്ക് പോവുകയായിരുന്നു ചന്ദ്രയാഗപ്പയും കുടുംബവും. കഴിഞ്ഞ ഒക്ടോബറിലാണ് ആഡംബര കാര്‍ ഇവര്‍ വാങ്ങുന്നത്. മൃതദേഹം നെലമംഗലയിലെ സര്‍ക്കാര്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. അപകടത്തെ തുടര്‍ന്ന് ദേശീയപാതയില്‍ മൂന്നു കിലോമീറ്ററിലേറെ ദൂരം ഗതാഗതക്കുരുക്ക് ഉണ്ടായി.