നമ്മുടെ സ്വന്തം അയല്‍ക്കാരന്‍ സ്വദേശി ഡോ. വി.നാരായണന്‍ ഐഎസ്ആര്‍ഒയുടെ പുതിയ ചെയര്‍മാന്‍. നിലവിലെ ചെയര്‍മാന്‍ എസ്.സോമനാഥിന്റെ കാലാവധി കഴിയുന്നതിനാലാണ് നിയമനം. നിലവില്‍ തിരുവനന്തപുരം എല്‍പിഎസ്‌സി മേധാവിയാണ് വി.നാരായണന്‍. എസ്.സോമനാഥിന് കാലാവധി നീട്ടി നല്‍കിയിരുന്നില്ല.

മറ്റന്നാള്‍ നടക്കുന്ന സ്‌പെഡ്ക്‌സ് പരീക്ഷണമായിരിക്കും സോമനാഥിന്റെ അവസാന പരിപാടി. വലിയ ബഹുമതിയാണ് പുതിയ സ്ഥാനമെന്ന് വി.നാരായണന്‍ പറഞ്ഞു. വിക്രം സാരാഭായി അടക്കമുള്ള പ്രമുഖര്‍ വഹിച്ച സ്ഥാനത്തേക്ക് പരിഗണിച്ചതില്‍ രാജ്യത്തോട് നന്ദി പറയുന്നു. നിറയെ പരിപാടികള്‍ ഉള്ള സമയത്തതാണ് പുതിയ സ്ഥാനം. എല്ലാവരുടെയും പുന്തുണ വേണമെന്നും അദ്ദേഹം പറഞ്ഞു. രണ്ടു വര്‍ഷത്തേക്കാണ് നിയമനം

ഇത് ഏറെ നിര്‍ണായകമായ ഉത്തരവാദിത്വമാണെന്നും പ്രധാനമന്ത്രിയോടും കേന്ദ്രസര്‍ക്കാരിനോടും നന്ദി പറയുന്നുവെന്നും അദ്ദേഹം പ്രതികരിച്ചു. തിരുവനന്തപുരത്ത് വലിയമല ആസ്ഥാനവും ബെംഗളൂരുവില്‍ ഒരു യൂണിറ്റും ഉള്ള ഇന്ത്യന്‍ ബഹിരാകാശ ഗവേഷണ സംഘടനയുടെ (ISRO) പ്രധാന കേന്ദ്രങ്ങളിലൊന്നായ ലിക്വിഡ് പ്രൊപ്പല്‍ഷന്‍ സിസ്റ്റംസ് സെന്ററിന്റെ (LPSC) ഡയറക്ടറാണ് ഡോ. വി നാരായണന്‍.

റോക്കറ്റ് & സ്‌പേസ് ക്രാഫ്റ്റ് പ്രൊപ്പല്‍ഷന്‍ വിദഗ്ധനായ ഡോ. വി നാരായണന്‍ 1984-ല്‍ ഐഎസ്ആര്‍ഒയില്‍ ചേരുകയും എല്‍പിഎസ് സിയുടെ ഡയറക്ടറാകുന്നതിന് മുമ്പ് വിവിധ പദവികളില്‍ പ്രവര്‍ത്തിക്കുകയും ചെയ്തിട്ടുണ്ട്. പ്രാരംഭ ഘട്ടത്തില്‍, നാലര വര്‍ഷക്കാലം, വിക്രം സാരാഭായ് ബഹിരാകാശ കേന്ദ്രത്തിലെ (VSSC) സൗണ്ടിംഗ് റോക്കറ്റുകളുടെയും ഓഗ്മെന്റഡ് സാറ്റലൈറ്റ് ലോഞ്ച് വെഹിക്കിള്‍ (എഎസ്എല്‍വി), പോളാര്‍ സാറ്റലൈറ്റ് ലോഞ്ച് വെഹിക്കിള്‍ (പിഎസ്എല്‍വി) എന്നിവയുടെ സോളിഡ് പ്രൊപ്പല്‍ഷന്‍ ഏരിയയിലും പ്രവര്‍ത്തിച്ചു. അബ്ലേറ്റീവ് നോസല്‍ സിസ്റ്റങ്ങള്‍, കോമ്പോസിറ്റ് മോട്ടോര്‍ കേസുകള്‍, കോമ്പോസിറ്റ് ഇഗ്‌നൈറ്റര്‍ കേസുകള്‍ എന്നിവയുടെ പ്രോസസ് പ്ലാനിംഗ്, പ്രോസസ് കണ്‍ട്രോള്‍, റിയലൈസേഷന്‍ എന്നിവയില്‍ സംഭാവന നല്‍കി.

ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി ഖരഗ്പൂരിലെ പൂര്‍വ്വ വിദ്യാര്‍ത്ഥിയാണ് ഡോ. വി നാരായണന്‍. എംടെക്കും 1989-ല്‍ ക്രയോജനിക് എഞ്ചിനീയറിംഗില്‍ ഒന്നാം റാങ്കും 2001-ല്‍ എയ്റോസ്പേസ് എഞ്ചിനീയറിംഗില്‍ പി.എച്ച്.ഡിയും നേടി. ഖരഗ്പൂര്‍ ഐഐടിയില്‍ നിന്ന് എംടെക്കില്‍ ഒന്നാം റാങ്കിന് വെള്ളി മെഡലും ആസ്ട്രോനോട്ടിക്കല്‍ സൊസൈറ്റി ഓഫ് ഇന്ത്യയുടെ (എഎസ്‌ഐ) സ്വര്‍ണ്ണ മെഡലും നേടിയിട്ടുണ്ട്.

റോക്കറ്റിനും അനുബന്ധ സാങ്കേതികവിദ്യകള്‍ക്കുമുള്ള എഎസ്‌ഐ അവാര്‍ഡ്, ഹൈ എനര്‍ജി മെറ്റീരിയല്‍സ് സൊസൈറ്റി ഓഫ് ഇന്ത്യയില്‍ നിന്നുള്ള ടീം അവാര്‍ഡ്, ഐഎസ്ആര്‍ഒയുടെ മികച്ച നേട്ടങ്ങളും പ്രകടന മികവുമുള്ള അവാര്‍ഡുകളും ടീം എക്‌സലന്‍സ് അവാര്‍ഡുകളും ചെന്നൈയിലെ സത്യബാമ സര്‍വകലാശാലയില്‍ നിന്ന് ഡോക്ടറേറ്റ് ഓഫ് സയന്‍സ് (ഹോണറിസ് കോസ) ഓണററി ബിരുദവും അദ്ദേഹത്തിന് ലഭിച്ചിട്ടുണ്ട്.

ഖരഗ്പൂരിലെ ഐഐടിയുടെ വിശിഷ്ട പൂര്‍വ്വ വിദ്യാര്‍ത്ഥി അവാര്‍ഡ്-2018, നാഷണല്‍ ഡിസൈന്‍ ആന്‍ഡ് റിസര്‍ച്ച് ഫോറം ഓഫ് എഞ്ചിനീയേഴ്സിന്റെ (ഇന്ത്യ) നാഷണല്‍ ഡിസൈന്‍ അവാര്‍ഡ്-2019, എയറോനോട്ടിക്കല്‍ സൊസൈറ്റി ഓഫ് ഇന്ത്യ (AeSI) യുടെ നാഷണല്‍ എയറോനോട്ടിക്കല്‍ പ്രൈസ്-2019 ഡോ. വി നാരായണന് ലഭിച്ചിട്ടുണ്ട്.

ഡോ. വി നാരായണന്‍ ഇന്റര്‍നാഷണല്‍ അക്കാദമി ഓഫ് അസ്ട്രോനോട്ടിക്സിലെ (IAA) അംഗമാണ്. ഇന്ത്യന്‍ നാഷണല്‍ അക്കാദമി ഓഫ് എഞ്ചിനീയറിംഗിന്റെ ഫെലോ, ഇന്റര്‍നാഷണല്‍ ആസ്‌ട്രോനോട്ടിക്കല്‍ ഫെഡറേഷന്റെ സ്പേസ് പ്രൊപ്പല്‍ഷന്‍ കമ്മിറ്റി അംഗം, ഇന്ത്യന്‍ സൊസൈറ്റി ഓഫ് സിസ്റ്റംസ് ഫോര്‍ സയന്‍സ് ആന്‍ഡ് എഞ്ചിനീയറിംഗിന്റെ (ISSE), ഫെല്ലോ ഇന്‍സ്റ്റിറ്റിയൂഷന്‍ ഓഫ് എഞ്ചിനീയേഴ്സ് (ഇന്ത്യ), ഇന്ത്യന്‍ ക്രയോജനിക് കൗണ്‍സിലിന്റെ ഫെല്ലോ, എയറോനോട്ടിക്കല്‍ സൊസൈറ്റി ഓഫ് ഇന്ത്യയുടെ ഫെലോ, ഐഎന്‍എഇ ഗവേണിംഗ് കൗണ്‍സില്‍ അംഗമായും സേവനമനുഷ്ഠിച്ചു.

വിവിധ ദേശീയ അന്തര്‍ദേശീയ പ്രൊഫഷണല്‍ ബോഡികളില്‍ അംഗമാണ്. ഗവേണിംഗ് കൗണ്‍സില്‍ അംഗമായും ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സ്‌പേസ് സയന്‍സ് ആന്‍ഡ് ടെക്‌നോളജിയുടെ (ഐഐഎസ്ടി) ബോര്‍ഡ് അംഗമായും ചില എഞ്ചിനീയറിംഗ് കോളേജുകളിലെ അക്കാദമിക് കൗണ്‍സില്‍ അംഗമായും സേവനമനുഷ്ഠിക്കുന്നു. ധാരാളം സാങ്കേതിക പ്രബന്ധങ്ങള്‍ ഡോ. വി നാരായണന്‍ പ്രസിദ്ധീകരിച്ചിട്ടുണ്ട്. ഐ.ഐ.ടി.യും എന്‍.ഐ.ടി.യും ഉള്‍പ്പെടെയുള്ള എന്‍ജിനീയറിങ് സ്ഥാപനങ്ങളില്‍ ധാരാളം മുഖ്യപ്രഭാഷണങ്ങളും പത്ത് കോണ്‍വൊക്കേഷന്‍ പ്രസംഗങ്ങളും അദ്ദേഹം നടത്തിയിട്ടുണ്ട്.