എടിഎമ്മില്‍ നിറയ്ക്കാനെത്തിച്ച ഒരു കോടി രൂപ ബൈക്കിലെത്തിയ സംഘം കവര്‍ന്നു. പട്ടാപ്പകല്‍ സുരക്ഷാജീവനക്കാര്‍ക്കു നേരേ വെടിയുതിര്‍ത്ത ശേഷമാണ് സംഘം പണവും കൊണ്ട് കടന്നത്. വ്യാഴാഴ്ച ഉച്ചയോടെ കര്‍ണാടകയിലെ ബിദറിലായിരുന്നു സംഭവം. ബൈക്കിലെത്തിയ അക്രമികള്‍ വാഹനം തടഞ്ഞു നിര്‍ത്തി സുരക്ഷാ ജീവനക്കാര്‍ക്കു നേരെ വെടി വയ്ക്കുകയായിരുന്നു. ഒരാള്‍ സംഭവസ്ഥലത്ത് വച്ചു തന്നെ കൊല്ലപ്പെട്ടു. സുരക്ഷാ ജീവനക്കാരനായ ഗിരി വെങ്കടേഷ് ആണ് മരിച്ചത്. മറ്റൊരാളെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചിട്ടുണ്ട്. മോഷണത്തിന്റെ വിഡിയോ ദൃശ്യങ്ങളും അതിനിടെ പുറത്തുവന്നു.

ബിദറിലെ ശിവാജി ചൗക്കിലുള്ള എടിഎമ്മില്‍ പണം നിറയ്ക്കാനാണു സുരക്ഷാ ജീവനക്കാര്‍ എത്തിയത്. ഇതിനിടെ ബൈക്കിലെത്തിയ ഹെല്‍മറ്റ് ധാരികളായ രണ്ട് മോഷ്ടാക്കള്‍ ഇവര്‍ക്കു നേരെ വെടിയുതിര്‍ക്കുകയായിരുന്നു. തുടര്‍ന്നു വാഹനത്തിലുണ്ടായിരുന്ന പണപ്പെട്ടി തട്ടിയെടുത്തു കടന്നുകളയുകയായിരുന്നു. തിരക്കേറിയ റോഡില്‍ ആളുകള്‍ നോക്കിനില്‍ക്കെ ആയിരുന്നു സംഭവം. ഒരു കോടി രൂപയോളം രൂപ മോഷണം പോയതായി പ്രാദേശിക മാധ്യമം റിപ്പോര്‍ട്ട് ചെയ്തു.

നാട്ടുകാര്‍ കല്ലെറിഞ്ഞ് അക്രമികളെ പിടികൂടാന്‍ ശ്രമിക്കുന്നതും ദൃശ്യങ്ങളില്‍ നിന്നും വ്യക്തമാണ്. എന്നാല്‍ പ്രതികള്‍ വിദഗ്ധമായി കടന്നുകളഞ്ഞു.

എസ്ബിഐ എടിഎമ്മില്‍ നിറയ്ക്കാനാണു സുരക്ഷാ ജീവനക്കാര്‍ പണം എത്തിച്ചതെന്നാണ് റിപ്പോര്‍ട്ട്. അക്രമികളെ പിടികൂടാന്‍ കര്‍ണാടക പൊലീസ് തിരച്ചില്‍ ഊര്‍ജിതമാക്കി. അക്രമികള്‍ തെലങ്കാനയിലേക്ക് കടക്കാന്‍ സാധ്യതയുള്ളതിനാല്‍ അതിര്‍ത്തിയില്‍ കര്‍ശന പരിശോധനയാണു കര്‍ണാടക പൊലീസ് നടത്തുന്നത്.