ട്രംപ് അധികാരമേൽക്കുന്നതോടെ ഇന്ത്യയും ഏറെ പ്രതീക്ഷയിലാണ് . പുതിയ മാറ്റങ്ങൾ അമേരിക്കയിൽ വരുമ്പോൾ അത് ഇന്ത്യയ്ക്കും ഗുണകരമാവും എന്നുള്ളതിൽ യാതൊരു സംശയവുമില്ല .  ഇന്ത്യ-യുഎസ് ബന്ധം കൂടുതൽ ദൃഢമാകുമെന്ന പ്രതീക്ഷ ഉയർത്തി അമേരിക്കൻ പ്രസി‍ഡന്റിന്റെ സ്ഥാനാരോഹണം. ട്രംപിന്റെ സത്യപ്രതിജ്ഞയ്‌ക്ക് ശേഷം നടന്ന ചടങ്ങിൽ ഇന്ത്യയുടെ വിദേശകാര്യ മന്ത്രി എസ്. ജയശങ്കറിന് ലഭിച്ച ഇരിപ്പിടമാണ് ഇപ്പോൾ ചർച്ചയാകുന്നത്.

ഇക്വഡോർ പ്രസിഡൻ്റ് ഡാനിയൽ നൊബോവയ്‌ക്കൊപ്പം മുൻനിരയിലായിരുന്നു ജയശങ്കറിന്റെ സ്ഥാനം. ഇന്ത്യൻ ഭരണകൂടത്തിന്റെ പ്രത്യേക പ്രതിനിധിയായി എത്തിയ ഡോ. ജയശങ്കറിന് മുൻനിരയിൽ തന്നെ ഇരിപ്പിടം ഒരുക്കിയത് ഔദ്യോ​ഗിക പ്രോട്ടോക്കോളിൽ വരുത്തിയ നവീകരണങ്ങളുടെ ഫലം കൂടിയാണ്.ക്യാപിറ്റൽ റൊട്ടുണ്ടയിൽ നടന്ന ചടങ്ങിൽ എസ്. ജയശങ്കർ മുൻനിരയിൽ ഇരുന്നപ്പോൾ, ജാപ്പനീസ് വിദേശകാര്യ മന്ത്രി തകേഷി ഇവായക്ക് രണ്ടുവരി പിറകിലായിരുന്നു സ്ഥാനം ലഭിച്ചത്.

47-ാമത് യുഎസ് പ്രസിഡൻ്റായി അധികാരമേറ്റ ട്രംപിനായി നരേന്ദ്രമോദി കൊടുത്തുവിട്ട കത്ത് ജയശങ്കർ കൈമാറി. ട്രംപിന്റെ സത്യപ്രതിജ്ഞാ ചടങ്ങിൽ ഇന്ത്യയെ പ്രതിനിധീകരിക്കാൻ കഴിഞ്ഞത് സവിശേഷമായി കരുതുന്നുവെന്നും എസ്. ജയശങ്കർ എക്സിൽ കുറിച്ചു. വാഷിംഗ്ടൺ ഡിസിയിൽ നടന്ന സത്യപ്രതിജ്ഞാ ചടങ്ങിൽ ഇന്ത്യയുടെ വിദേശകാര്യ മന്ത്രിയെന്ന നിലയിലും പ്രധാനമന്ത്രി മോദിയുടെ പ്രത്യേക ദൂതനായും പ്രതിനിധീകരിക്കാൻ അവസരം ലഭിച്ചത് വലിയൊരു അംഗീകാരമാണെന്നും അദ്ദേഹം എക്സിൽ എഴുതി.