ഒരു രാജ്യം ഒരു തിരഞ്ഞെടുപ്പ് നയപരമായ സ്തംഭനാവസ്ഥ തടയും: ഭരണഘടനയുടെയും ഇന്ത്യയുടെ സമ്പന്നമായ നാഗരിക പൈതൃകത്തിന്റെ പ്രാധാന്യത്തിനും അടിവരയിടുന്ന വാക്കുകളുമായി രാഷ്ട്രപതി ദ്രൗപദി മുര്‍മു
ഭരണഘടനയുടെയും ഇന്ത്യയുടെ സമ്പന്നമായ നാഗരിക പൈതൃകത്തിന്റെ പ്രാധാന്യത്തിനും അടിവരയിടുന്ന വാക്കുകളുമായി രാഷ്ട്രപതി ദ്രൗപദി മുര്‍മു. 76-ാമത് റിപ്പബ്ലിക് ദിനത്തിന്റെ തലേന്ന് രാജ്യത്തെ അഭിസംബോധന ചെയ്തു സംസാരിക്കുകയായിരുന്നു രാഷ്ട്രപതി. നീതി, സ്വാതന്ത്ര്യം, സമത്വം, സാഹോദര്യം എന്നിവ രാജ്യത്തിന്റെ ധാര്‍മികതയില്‍ ആഴത്തില്‍ വേരൂന്നിയതെങ്ങനെയെന്നും രാഷ്ട്രപതി തന്റെ പ്രസംഗത്തില്‍ എടുത്തുപറഞ്ഞു.
''ഇന്ത്യക്കാര്‍ എന്ന നിലയില്‍ നമ്മുടെ കൂട്ടായ സ്വത്വത്തിന്റെ ആത്യന്തിക അടിത്തറയാണ് ഭരണഘടന. ഒരു കുടുംബമെന്ന നിലയില്‍ അത് നമ്മളെ ബന്ധിപ്പിക്കുന്നു. സഹസ്രാബ്ദങ്ങളായി പൗര ധര്‍മങ്ങള്‍ നമ്മുടെ ധാര്‍മികതയുടെ ഭാഗമായതിനാല്‍ ഭരണഘടന ഒരു ജീവനുള്ള രേഖയായി മാറിയിരിക്കുന്നു. നീതി, സ്വാതന്ത്ര്യം, സമത്വം, സാഹോദര്യം എന്നിവ എല്ലായ്‌പ്പോഴും നമ്മുടെ നാഗരിക പാരമ്പര്യത്തിന്റെ അവിഭാജ്യ ഘടകമാണ്. ലോകത്തിലെ ഏറ്റവും പഴക്കമുള്ള നാഗരികതകളില്‍ ഒന്നാണ് ഇന്ത്യയിലേത്. അറിവിന്റെയും ജ്ഞാനത്തിന്റെയും ഉറവിടമായിരുന്ന ഇന്ത്യ ഒരു കാലത്ത് ലോകത്ത് പ്രസിദ്ധമായിരുന്നു.''- രാഷ്ട്രപതി പറഞ്ഞു.
''ഒരു രാജ്യം ഒരു തിരഞ്ഞെടുപ്പ് പദ്ധതി നടപ്പാക്കുന്നതിലൂടെ ഭരണത്തിലെ സ്ഥിരതയെ പ്രോത്സാഹിപ്പിക്കാനും നയപരമായ സ്തംഭനാവസ്ഥ തടയാനും സാമ്പത്തിക ഭാരം കുറയ്ക്കാനും ഒരു പരിധി വരെ കഴിയും. ധീരവും ദീര്‍ഘവീക്ഷണമുള്ളതുമായ സാമ്പത്തിക പരിഷ്‌കാരങ്ങള്‍ വരും വര്‍ഷങ്ങളിലും പുരോഗതിയുടെ ഈ പ്രവണതയെ നിലനിര്‍ത്തും. ക്ഷേമം എന്ന ആശയത്തെ ഈ സര്‍ക്കാര്‍ പുനര്‍നിര്‍വചിച്ചു. അടിസ്ഥാന ആവശ്യങ്ങള്‍ അവകാശമാക്കി. കൊളോണിയല്‍ ചിന്താഗതി മാറ്റാനുള്ള യോജിച്ച ശ്രമങ്ങള്‍ക്കും നാം സമീപകാലത്ത് സാക്ഷ്യം വഹിച്ചു.'' - രാഷ്ട്രപതി പറഞ്ഞു.
ക്ഷേമ സംരംഭങ്ങള്‍, കാലാവസ്ഥാ വ്യതിയാനത്തെ ചെറുക്കാനുള്ള ശ്രമങ്ങള്‍, ഭരണം പുനര്‍നിര്‍വചിക്കാന്‍ ലക്ഷ്യമിട്ടുള്ള പരിഷ്‌കാരങ്ങള്‍ എന്നിവയെ കുറിച്ചും രാഷ്ട്രപതി പ്രസംഗത്തില്‍ എടുത്തുപറഞ്ഞു. ഒളിംപിക്സിലെയും പാരാലിംപിക്സിലെയും രാജ്യത്തിന്റെ നേട്ടങ്ങള്‍ ഉയര്‍ത്തിക്കാണിച്ച രാഷ്ട്രപതി കായികരംഗത്ത് ഇന്ത്യയുടെ ശ്രദ്ധേയമായ മുന്നേറ്റങ്ങളെയും അഭിനന്ദിച്ചു. ഏറ്റവും പ്രായം കുറഞ്ഞ ലോക ചെസ് ചാംപ്യനായി മാറിയ ഡി.ഗുകേഷിനെയും രാഷ്ട്രപതി പ്രശംസിച്ചു. 80 കോടി തൈകള്‍ നട്ടുപിടിപ്പിക്കുക എന്ന ലക്ഷ്യത്തോടെ പ്രവര്‍ത്തിക്കുന്ന 'മിഷന്‍ ലൈഫ് സ്‌റ്റൈല്‍ ഫോര്‍ എന്‍വയോണ്‍മെന്റ്', 'ഏക് പെദ് മാ കേ നാം' ക്യാംപെയ്‌നുകളെയും രാഷ്ട്രപതി തന്റെ പ്രസംഗത്തില്‍ എടുത്തു പറഞ്ഞു. കൂടാതെ ബഹിരാകാശ രംഗത്ത് മികച്ച നേട്ടങ്ങള്‍ കൈവരിച്ച ഐഎസ്ആര്‍ഒയുടെ സമീപകാല വിജയങ്ങളെയും രാഷ്ട്രപതി പ്രശംസിച്ചു.
https://www.facebook.com/Malayalivartha
