യമുനയില്‍ വിഷം കലര്‍ത്തുന്നെന്ന ആരോപണം: അരവിന്ദ് കേജ്രിവാള്‍ 17ന് മുന്‍പ് ഹാജരാകണമെന്ന് ഹരിയാന കോടതി
ഹരിയാന സര്‍ക്കാര്‍ യമുന നദിയില്‍ വിഷം കലര്‍ത്തുന്നെന്ന ആരോപണത്തില്‍ ആം ആദ്മി പാര്‍ട്ടി ദേശീയ കണ്‍വീനര്‍ അരവിന്ദ് കേജ്രിവാളിന് സമന്‍സ് അയച്ച് ഹരിയാന കോടതി. ഫെബ്രുവരി 17ന് മുന്‍പ് കോടതിയില്‍ കേജ്രിവാള്‍ ഹാജരാകണമെന്നും അല്ലാത്തപക്ഷം നിയമപ്രകാരമുള്ള നടപടികള്‍ നേരിടുമെന്നും കോടതി നോട്ടിസില്‍ അറിയിച്ചു.
ഡല്‍ഹിയുടെ കുടിവെള്ള വിതരണം തകര്‍ക്കാന്‍ ഹരിയാനയിലെ ബിജെപി സര്‍ക്കാര്‍ യമുനയില്‍ വിഷം കലര്‍ത്തുന്നെന്നായിരുന്നു കേജ്രിവാളിന്റെ ആരോപണം. ആരോപണം തെളിയിക്കുന്ന രേഖകള്‍ ഹാജരാക്കണമെന്നും കോടതി കേജ്രിവാളിന് നിര്‍ദേശം നല്‍കി.
അതിനിടെ, കേജ്രിവാളിന്റെ ആരോപണത്തില്‍ ഹരിയാന മുഖ്യമന്ത്രി നായബ് സെയ്‌നി യമുനയിലെ വെള്ളം കുടിച്ച് പ്രതിഷേധിച്ചു. ഇതിന്റെ വിഡിയോ സെയ്‌നി എക്‌സില്‍ പങ്കുവയ്ക്കുകയും ചെയ്തു. 'ഹരിയാന അതിര്‍ത്തിയില്‍ യമുനയില്‍ നിന്നുള്ള വെള്ളം കുടിച്ചു. അതിഷി വന്നില്ല.
അവര്‍ പുതിയ നുണകള്‍ മെനയുകയാകും. സത്യം എന്തായാലും പുറത്തുവരും. അതുകൊണ്ടാണ് ആംആദ്മി പാര്‍ട്ടിയുടെ നുണകളൊന്നും ഫലിക്കാത്തത്'-സെയ്‌നി പറഞ്ഞു. ഹരിയാനയുടെ നന്ദിയില്ലാത്ത മകനായ കേജ്രിവാളിനെ ഡല്‍ഹിയിലെ ജനങ്ങള്‍ ശിക്ഷിക്കുമെന്നും സെയ്‌നി കൂട്ടിച്ചേര്‍ത്തു.
https://www.facebook.com/Malayalivartha
