പ്രയാഗ്രാജില്‍ മഹാകുംഭമേളക്കിടെ ഉണ്ടായ അപകടത്തില്‍ മരിച്ച കര്‍ണാടക സ്വദേശികളുടെ കുടുംബങ്ങള്‍ക്ക് ധനസഹായം പ്രഖ്യാപിച്ച് മുഖ്യമന്ത്രി സിദ്ധരാമയ്യ. മരിച്ച നാല് പേരുടെ വീട്ടുകാര്‍ക്ക് എത്രയും വേഗം സഹായം ഉറപ്പാക്കും. മരിച്ചവരുടെ മൃതദേഹങ്ങള്‍ നാട്ടിലേക്ക് എത്തിക്കാന്‍ എയര്‍ ആംബുലന്‍സ് ഉള്‍പ്പെടെ സൗകര്യങ്ങള്‍ ഒരുക്കുന്നുണ്ട്. സാഹചര്യങ്ങള്‍ നിരീക്ഷിച്ചു വരുകയാണ്.

സംസ്ഥാനത്ത് നിന്നും കാണാതായ മറ്റ് 8 പേരുടെ വിവരങ്ങള്‍ ഇതുവരെ ലഭിച്ചിട്ടില്ലെന്നും സിദ്ധരാമയ്യ പറഞ്ഞു. മഹാകുംഭമേളയില്‍ ബുധനാഴ്ച പുലര്‍ച്ചെയുണ്ടായ തിക്കിലും തിരക്കിലും പെട്ട് 30 പേര്‍ക്കാണ് ജീവന്‍ നഷ്ടമായത്. പത്ത് പേര്‍ മരിച്ചെന്നായിരുന്നു ആദ്യം പുറത്തുവന്ന റിപ്പോര്‍ട്ട് എന്നാല്‍ പിന്നീട് മരണസംഖ്യ ഉയരുകയായിരുന്നു. 90 പേര്‍ക്കാണ് പരിക്കേറ്റതെന്നും പൊലീസ് സ്ഥിരീകരിച്ചിരുന്നു. ബാരിക്കേഡ് മറികടക്കാന്‍ വലിയ ആള്‍ക്കൂട്ടം ശ്രമിച്ചതാണ് അപകട കാരണമെന്ന് യുപി മുഖ്യമന്ത്രി യോഗി ആദിത്യനാഥ് അറിയിച്ചിരുന്നു.

അതേസമയം, മഹാ കുംഭമേളയില്‍ വീണ്ടും തീപിടുത്തം ഉണ്ടായതായി റിപ്പോര്‍ട്ട്. പ്രയാഗ്രാജില്‍ നടന്നുകൊണ്ടിരിക്കുന്ന മഹാകുംഭമേളയുടെ സെക്ടര്‍-22-ലെ തീപിടിത്തത്തില്‍ നിരവധി പന്തലുകള്‍ കത്തിനശിച്ചു. എന്നാല്‍, അഗ്‌നിശമനസേന യഥാസമയം തീ നിയന്ത്രണ വിധേയമാക്കി. ഈ സംഭവത്തില്‍ ജീവഹാനി സംഭവിച്ചതായി വിവരമില്ല. തീപിടിത്തത്തിന്റെ കാരണം നിലവില്‍ അറിവായിട്ടില്ല. ഭക്തരോട് സമാധാനം പാലിക്കണമെന്ന് അഭ്യര്‍ത്ഥിക്കുന്ന ഉദ്യോഗസ്ഥര്‍ സംഭവത്തില്‍ അന്വേഷണം ആരംഭിച്ചിട്ടുണ്ട്.

ഈ തീപിടിത്തത്തില്‍ 15 ടെന്റുകള്‍ കത്തിനശിച്ചതായാണ് വിവരം. തീപിടിത്തത്തെക്കുറിച്ച് വിവരം ലഭിച്ചയുടന്‍ അഗ്‌നിശമനസേനയെ വിവരമറിയിച്ചു. എന്നാല്‍, ടെന്റിലേക്ക് എത്താന്‍ റോഡില്ലാത്തതിനാല്‍ സംഘത്തിന് എത്താന്‍ ബുദ്ധിമുട്ടായിരുന്നു. ഇത് വകവെക്കാതെ അഗ്‌നിശമന സേന കൃത്യസമയത്ത് എത്തി വലിയ അപകടങ്ങളൊന്നും കൂടാതെ തീ നിയന്ത്രണ വിധേയമാക്കി.