ഡല്‍ഹി നിയമസഭാ തിരഞ്ഞെടുപ്പിന്റെ വോട്ടെടുപ്പ് തുടങ്ങി. 70 മണ്ഡലങ്ങളിലായി 699 സ്ഥാനാര്‍ഥികളാണ് ജനവിധി തേടുന്നത്. ഇതില്‍ 96 വനിതകളും ഒരു ട്രാന്‍സ്‌ജെന്‍ഡറും ഉള്‍പ്പെടുന്നു.

ഒറ്റഘട്ടമായി നടക്കുന്ന വോട്ടെടുപ്പില്‍ ഒന്നരക്കോടി വോട്ടര്‍മാരാണ് വിധിയെഴുതുക. വോട്ടര്‍മാരില്‍ 83.76 ലക്ഷം പുരുഷന്മാരും 72.36 ലക്ഷം സ്ത്രീകളും 1,267 പേര്‍ ട്രാന്‍സ്‌ജെന്‍ഡറുകളുമാണ്. 13766 പോളിംഗ് ബൂത്തുകളാണ് തിരഞ്ഞെടുപ്പിനായി സജ്ജമാക്കിയിരിക്കുന്നത്. ഇതില്‍ 3000 ബൂത്തുകള്‍ പ്രശ്‌നബാധിത ബൂത്തുകളാണ്.

തിരഞ്ഞെടുപ്പ് കണക്കിലെടുത്ത് ഡല്‍ഹിയില്‍ സുരക്ഷ ശക്തമാക്കിയിട്ടുണ്ട്. കഴിഞ്ഞ തവണത്തെക്കാള്‍ വോട്ടിങ് ശതമാനം വര്‍ദ്ധിക്കുമെന്നാണ് പാര്‍ട്ടികളുടെ കണക്കുകൂട്ടല്‍.

ഫെബ്രുവരി എട്ടിനാണ് വോട്ടെണ്ണല്‍. മൂന്നാം തവണയും അധികാരം നിലനിര്‍ത്താനാകുമെന്ന പ്രതീക്ഷയിലാണ് എഎപി. അതേസമയം, 27 വര്‍ഷങ്ങള്‍ക്കുശേഷം ഡല്‍ഹിയില്‍ അധികാരത്തില്‍ എത്താനാകുമെന്ന കണക്കുകൂട്ടലിലാണ് ബിജെപി.

ആം ആദ്മി പാര്‍ട്ടി അധികാരത്തിലെത്തുന്നതുവരെ ഒന്നര പതിറ്റാണ്ടോളം ഡല്‍ഹി ഭരിച്ച കോണ്‍ഗ്രസും വളരെയേറെ പ്രതീക്ഷയോടാണുള്ളത്.