ഡല്‍ഹി തിരഞ്ഞെടുപ്പിലെ ജനവിധി വളരെ വിനയത്തോടെ സ്വീകരിക്കുന്നുവെന്നു ഡല്‍ഹി മുന്‍ മുഖ്യമന്ത്രി അരവിന്ദ് കേജ്രിവാള്‍. ഡല്‍ഹി നിയമസഭാ തിരഞ്ഞെടുപ്പില്‍ കനത്ത തകര്‍ച്ചയാണു എഎപി നേരിട്ടത്. 70 സീറ്റുകളില്‍ 23 ഇടത്തു മാത്രമാണു എഎപി ലീഡ് ചെയ്യുന്നത്. ബിജെപി നേതാവ് പര്‍വേശ് വര്‍മയാണ് കേജ്രിവാളിനെതിരെ അട്ടിമറി വിജയം നേടിയത്. 4,089 വോട്ടുകള്‍ക്കായിരുന്നു ഡല്‍ഹി മുന്‍ മുഖ്യമന്ത്രി നിയമസഭാ തിരഞ്ഞെടുപ്പില്‍ പരാജയപ്പെട്ടത്.

ഈ വിജയത്തിനു ബിജെപിയെ അഭിനന്ദിക്കുന്നുവെന്നും ജനങ്ങള്‍ക്കു നല്‍കിയ എല്ലാ വാഗ്ദാനങ്ങളും അവര്‍ നിറവേറ്റുമെന്നു പ്രതീക്ഷിക്കുന്നതായും അരവിന്ദ് കേജ്‌രിവാള്‍ പറഞ്ഞു. ഡല്‍ഹി തിരഞ്ഞെടുപ്പില്‍ കനത്ത പരാജയം ഏറ്റുവാങ്ങിയതിനു പിന്നാലെയായിരുന്നു വിഡിയോ സന്ദേശത്തിലൂടെ കേജ്‌രിവാള്‍ പ്രതികരിച്ചത്.

''കഴിഞ്ഞ 10 വര്‍ഷമായി ആരോഗ്യം, വിദ്യാഭ്യാസം, അടിസ്ഥാന സൗകര്യം എന്നീ മേഖലകളില്‍ വളരെയധികം പ്രവര്‍ത്തനങ്ങള്‍ ഞങ്ങള്‍ നടത്തി. ഞങ്ങള്‍ ക്രിയാത്മക പ്രതിപക്ഷത്തിന്റെ പങ്കു വഹിക്കുക മാത്രമല്ല, ജനങ്ങള്‍ക്കിടയില്‍ തുടരുകയും അവരെ സേവിക്കുന്നതു തുടരുകയും ചെയ്യും'' - അരവിന്ദ് കേജ്രിവാള്‍ പറഞ്ഞു.