യുഎസില്‍ നിന്ന് നാടുകടത്തപ്പെട്ടവരില്‍ സ്റ്റുഡന്റ് വിസയില്‍ യുകെയില്‍ എത്തിയ 21കാരിയുമുണ്ട്. 2024 ജനുവരിയിലാണ് താന്‍ യുകെയിലേക്ക് സ്റ്റുഡന്റ് വിസയില്‍ പോയതെന്ന് മുസ്‌കാന്‍ പറഞ്ഞു. ഈ വര്‍ഷം ജനുവരിയില്‍ മെക്‌സിക്കോയിലേക്ക് പോയി. അവിടെ നിന്ന് ടിജുവാന അതിര്‍ത്തി കടന്ന് യുഎസിലെത്തി.

ഏകദേശം 50 പേര്‍ ഉണ്ടായിരുന്നു. അവരില്‍ ഭൂരിഭാഗവും ലോകത്തിന്റെ വിവിധ ഭാഗങ്ങളില്‍ നിന്നുള്ള സ്ത്രീകളാണ്. അതിര്‍ത്തി കടന്നപ്പോള്‍ ഒരു ബസ് തങ്ങളെ ഒരു ക്യാമ്പിലേക്ക് കൊണ്ടുപോയെന്ന് മുസ്‌കാന്‍ പറയുന്നു. സുരക്ഷാ ഉദ്യോഗസ്ഥരെത്തി ബാഗുകളും മൊബൈല്‍ ഫോണുകളും കൊണ്ടുപോയി. അവര്‍ നല്‍കിയ വസ്ത്രങ്ങള്‍ ധരിച്ചെന്നും യുവതി പറഞ്ഞു.

യുഎസ് അതിര്‍ത്തി കടക്കുമ്പോള്‍ സുരക്ഷാ ഉദ്യോഗസ്ഥരെ ആരെയും കണ്ടിരുന്നില്ലെന്നും അവര്‍ ക്യാമറയിലൂടെ തങ്ങളെ കണ്ടിട്ടുണ്ടാവാമെന്നും മുസ്‌കാന്‍ പറഞ്ഞു. കുറേ ദിവസം ക്യാമ്പില്‍ കഴിഞ്ഞു. മാന്യമായാണ് ഉദ്യോഗസ്ഥര്‍ പെരുമാറിയത്. നാട് കടത്താന്‍ പോവുകയാണെന്ന് അറിഞ്ഞില്ല. മൂന്നു ദിവസം അമേരിക്കന്‍ സൈനിക വിമാനത്തിലായിരുന്നു. കയ്യില്‍ വിലങ്ങും കാലില്‍ ചങ്ങലയും ഇട്ടിരുന്നെങ്കിലും ഭക്ഷണം കഴിക്കാന്‍ അനുവദിച്ചു. അമൃത്സറിലേക്കുള്ള യാത്രയിലാണെന്ന് വിമാനത്തില്‍ വെച്ചാണ് അറിഞ്ഞത്. ഈ രീതിയില്‍ ഇന്ത്യയിലേക്ക് മടങ്ങേണ്ടി വന്നതില്‍ വിഷമം തോന്നിയെന്നും മുസ്‌കാന്‍ പറഞ്ഞു.

ജനുവരി മുതല്‍ തനിക്ക് കുടുംബത്തോട് സംസാരിക്കാന്‍ കഴിഞ്ഞിട്ടില്ലെന്നും ഓസ്ട്രേലിയയിലെ ഒരു ബന്ധുവില്‍ നിന്നാണ് തന്നെ നാടുകടത്തിയ വിവരം അവര്‍ അറിഞ്ഞെന്നും മുസ്‌കാന്‍ പറയുന്നു. 45 ലക്ഷം രൂപ ചെലവഴിച്ചാണ് കുടുംബം തന്നെ വിദേശത്തേക്ക് അയച്ചത്. നിയമപരമായ വഴികളിലൂടെ തിരികെ വരാന്‍ യുഎസ് ഉദ്യോഗസ്ഥര്‍ ആവശ്യപ്പെട്ടപ്പോള്‍ താന്‍ വികാരാധീനനായെന്ന് മുസ്‌കാന്‍ പറയുന്നു.

യുകെയിലോ തടവിലാക്കിയെങ്കിലും യുഎസിലോ തനിക്ക് ഒരിക്കലും അരക്ഷിതാവസ്ഥ തോന്നിയിട്ടില്ലെന്നും വിദ്യാര്‍ത്ഥിനി പറഞ്ഞു. നാല് സഹോദരിമാരില്‍ മൂത്ത കുട്ടിയായതിനാല്‍ കുടുംബത്തിനായി സമ്പാദിക്കാന്‍ ഇനിയും വിദേശത്തേക്ക് പോകുമെന്ന് തിരിച്ചെത്തിയ മുസ്‌കാന്‍ എന്ന 21കാരി പറഞ്ഞു. അതിനിടെ മുസ്‌കാന് ജോലി നല്‍കുന്ന കാര്യം സര്‍ക്കാരിന്റെ പരിഗണനയിലുണ്ടെന്ന് ഡെപ്യൂട്ടി കമ്മീഷണര്‍ ജിതേന്ദ്ര ജോര്‍വാള്‍ പറഞ്ഞു.