തമിഴ് സൂപ്പര്‍താരവും രാഷ്ട്രീയ പാര്‍ട്ടി നേതാവുമായ വിജയ്, തെരഞ്ഞെടുപ്പ് തന്ത്രജ്ഞനും രാഷ്ട്രീയ നേതാവുമായ പ്രശാന്ത് കിഷോറുമായി തിങ്കളാഴ്ച ഉച്ചയ്ക്ക് ചെന്നൈയിലെ വസതിയില്‍ നടത്തിയ കൂടിക്കാഴ്ച തമിഴകത്ത് വന്‍ വാര്‍ത്തയാകുകയാണ്. വിജയ്യുടെ തമിഴക വെട്രി കഴകം പാര്‍ട്ടി വൃത്തങ്ങള്‍ കിഷോറിന്റെ സന്ദര്‍ശനം പ്രധാന്യമുള്ളതല്ല എന്ന രീതിയിലാണ് പ്രതികരിച്ചത്. പാര്‍ട്ടിയുടെ തിരഞ്ഞെടുപ്പ് പ്രചാരണ തലവന്‍ ആധവ് അര്‍ജുന, ഇത് ഒരു സാധാരണ സന്ദര്‍ശനമാണെന്ന് വിശേഷിപ്പിച്ചെങ്കിലും, അടുത്ത വര്‍ഷം നടക്കാനിരിക്കുന്ന നിയമസഭാ തെരഞ്ഞെടുപ്പിന് മുന്നോടിയായി ടിവികെ തന്ത്രങ്ങള്‍ ആവിഷ്‌കരിക്കുന്നതിന്റെ ഭാഗമാണ് ഈ കൂടികാഴ്ച എന്നാണ് രാഷ്ട്രീയ വൃത്തങ്ങള്‍ ഊഹിക്കുന്നു.

യോഗത്തിന് മുന്‍ കൈ എടുത്തത് അടുത്തിടെ വിസികെ വിട്ട് വിജയ്‌യുടെ പാര്‍ട്ടിയില്‍ എത്തിയ ആധവ് അര്‍ജുനാണ്. അതേ സമയം ഇപ്പോള്‍ ബിഹാറില്‍ ജന്‍ സൂരജ് പാര്‍ട്ടി എന്ന രാഷ്ട്രീയ കക്ഷി നടത്തുന്ന പ്രശാന്ത് കിഷോര്‍ ഒരു സ്വകാര്യ സന്ദര്‍ശനം നടത്തിയെന്നാണ് ടിവികെ പറയുന്നത്. 'കഴിഞ്ഞ വര്‍ഷംപാര്‍ട്ടികള്‍ ആരംഭിച്ച രണ്ട് നേതാക്കള്‍ തമ്മിലുള്ള ചര്‍ച്ചയാണിത്''ഒരു മുതിര്‍ന്ന ടിവികെ നേതാവ് ഇന്ത്യന്‍ എക്‌സ്പ്രസിനോട് പറഞ്ഞു.

അതേ സമയം പാര്‍ട്ടിയുടെ സമ്പൂര്‍ണ്ണ സംഘടന ചട്ടക്കൂട് പൂര്‍ത്തിയാക്കിയ ശേഷം സമ്പൂര്‍ണ്ണ തിരഞ്ഞെടുപ്പ് പ്രവര്‍ത്തനങ്ങള്‍ ആരംഭിക്കുമെന്ന് ടിവികെ പ്രഖ്യാപിച്ചിട്ടുണ്ട്. വിജയ് മാര്‍ച്ച് ആദ്യംമുതല്‍ സംസ്ഥാനമൊട്ടാകെ ഒരു പര്യടനം ആരംഭിക്കും. അതേസമയം ആധവ് അര്‍ജുന്‍ തന്റെ സ്ഥാപനമായ വോയ്സ് ഓഫ് കോമണിന്റെ സഹായത്തോടെ ഡാറ്റാ ശേഖരണത്തിനും പാര്‍ട്ടിയുടെ വിപുലീകരണത്തിനും മേല്‍നോട്ടം വഹിക്കുമെന്നും റിപ്പോര്‍ട്ടുണ്ട്.

പ്രശാന്ത് കിഷോര്‍ രൂപം കൊടുത്ത് തെരഞ്ഞെടുപ്പ് തന്ത്ര ഏജന്‍സി ഐ പാക് തമിഴ്‌നാട്ടിലെ പ്രതിപക്ഷ കക്ഷി എഐഎഡിഎംകെയുമായി സഹകരിക്കാന്‍ തയ്യാറെടുക്കുമ്പോഴാണ് വിജയ് പ്രശാന്ത് കിഷോര്‍ കൂടികാഴ്ച എന്നതും ശ്രദ്ധേയമാണ്. അടുത്തിടെ വിജയ് എഐഎഡിഎംകെ മുന്നണി അഭ്യൂഹങ്ങള്‍ തമിഴകത്ത് സജീവനാണ്. 2021-ലെ പശ്ചിമ ബംഗാള്‍ നിയമസഭാ തിരഞ്ഞെടുപ്പില്‍ തുടര്‍ച്ചയായ മൂന്നാം വിജയത്തിലേക്ക് തൃണമൂല്‍ കോണ്‍ഗ്രസിനെ സഹായിച്ചതിന് ശേഷം കിഷോര്‍ രാഷ്ട്രീയ കണ്‍സള്‍ട്ടിംഗില്‍ നിന്ന് വിരമിക്കല്‍ പ്രഖ്യാപിച്ചിരുന്നു പ്രശാന്ത് കിഷോര്‍. കഴിഞ്ഞ വര്‍ഷം ഒക്ടോബര്‍ രണ്ടിന് അദ്ദേഹം ജന്‍ സൂരജ് പാര്‍ട്ടി രൂപീകരിച്ചിരുന്നു.