മക്കളുടെ മുമ്പില്‍ വെച്ച് യുവാവിനെ കഴുത്തറുത്ത് കൊന്ന കേസില്‍ ഭാര്യയും സുഹൃത്തും അറസ്റ്റില്‍. മഹാരാഷ്ട്രയിലെ മല്‍വാനി പോലീസ് സ്റ്റേഷന്‍ പരിധിയിലാണ് സംഭവം. കൊലപാതകത്തിന് ശേഷം ഇരുവരും പോലീസ് സ്റ്റേഷനിലെത്തി ആളെ കാണാനില്ലെന്ന തരത്തില്‍ പരാതിയും നല്‍കിയിരുന്നു. കൂലി തൊഴിലാളിയായിരുന്ന രാജേഷ് ചവാന്‍ ആണ് മരിച്ചത്. ഭാര്യ പൂജ, മരിച്ച രാജേഷിന്റെ സുഹൃത്തായ ഇംറാന്‍ മംസൂരി എന്നിവര്‍ അറസ്റ്റിലായി.

രാജേഷിന്റെയും പൂജയുടെയും എട്ടും പത്തും വയസുള്ള മക്കളുടെ മുന്നില്‍ വെച്ചായിരുന്നു കൊലപാതകം. ഇംറാന്‍ കഴിഞ്ഞ മൂന്ന് മാസമായി ഈ കുടുംബത്തിനൊപ്പമായിരുന്നു താമസം. ഇരുവരും തമ്മിലുള്ള അവിഹിത ബന്ധം രാജേഷ് അറിഞ്ഞതോടെ അയാളെ കൊല്ലാമെന്ന് ഇരുവരും തീരുമാനിക്കുകയായിരുന്നു എന്നാണ് പോലീസ് പറയുന്നത്. രാത്രി ഇരുവരും ചേര്‍ന്ന് രാജേഷിന് മദ്യം നല്‍കി ബോധരഹിതനാക്കിയ ശേഷം കഴുത്തറുത്ത് കൊല്ലുകയായിരുന്നു. ഈ സമയം ദമ്പതികളുടെ രണ്ട് മക്കളും അടുത്ത് തന്നെയുണ്ടായിരുന്നു. കൊലപാതക ശേഷം പൂജയും ഇംറാനും രക്തക്കറ വൃത്തിയാക്കി. ശേഷം ഇരുചക്ര വാഹനത്തില്‍ കയറിയിരുന്ന് രാജേഷിന്റെ മൃതദേഹം ഇരുവര്‍ക്കും ഇടയില്‍ ഇരിക്കുന്ന തരത്തില്‍ വെച്ചു. കഴുത്ത് ഷാള്‍ കൊണ്ട് മൂടി, രോഗിയായ ആളെ കൊണ്ടുപോകുന്ന തരത്തില്‍ ഓടിച്ചുപോയി. സമീപത്തെ കാട്ടില്‍ മൃതദേഹം ഉപേക്ഷിക്കുകയായിരുന്നു.

ശേഷം പോലീസ് സ്റ്റേഷനിലെത്തി രാജേഷിനെ കാണാനില്ലെന്ന പരാതി കൊടുക്കുകയായിരുന്നു. കേസ് അന്വേഷിക്കാന്‍ സിസിടിവി ദൃശ്യങ്ങള്‍ പരിശോധിച്ചപ്പോള്‍ ഇരുചക്ര വാഹനത്തില്‍ മൂന്ന് പേരും കൂടി പോകുന്നത് ശ്രദ്ധയില്‍പ്പെട്ട പോലീസ് നടത്തിയ വിശദമായി ചോദ്യം ചെയ്യലിലാണ് കൊലപാതക വിവരം പുറത്തുവന്നത്.