ബലാത്സംഗശ്രമം എതിര്‍ത്ത 5 വയസ്സുകാരിയെ 13കാരന്‍ കൊലപ്പെടുത്തി.ഛത്തീസ്ഗഡിലെ ബിലാസ്പുരിലാണ് സംഭവം നടന്നത്. 13 വയസ്സുകാരനെ പൊലീസ് കസ്റ്റഡിയിലെടുത്തു. നഗരത്തിലെ സര്‍കന്ദ പൊലീസ് സ്റ്റേഷന്‍ പരിധിയിലെ റസിഡന്‍ഷ്യല്‍ കോളനിയില്‍ നിര്‍മാണത്തിലിരിക്കുന്ന വീട്ടിലാണ് 5 വയസ്സുകാരിയായ പെണ്‍കുട്ടിയെ മരിച്ച നിലയില്‍ കണ്ടെത്തിയത്. തിങ്കളാഴ്ച വൈകുന്നേരം മുതല്‍ പെണ്‍കുട്ടിയെ കാണാതായിരുന്നു. പെണ്‍കുട്ടിയും ആണ്‍കുട്ടിയും അവരുടെ ബന്ധുക്കള്‍ക്കൊപ്പം കോളനിയിലെ ലേബര്‍ ക്വാര്‍ട്ടേഴ്‌സുകളിലൊന്നിലാണ് താമസിച്ചിരുന്നത്.

ആണ്‍കുട്ടി പെണ്‍കുട്ടിയേയും കൂട്ടി നിര്‍മാണത്തിലിരിക്കുന്ന വീട്ടിലേക്ക് നടക്കുന്നതിന്റെ ദൃശ്യങ്ങള്‍ സിസിടിവിയില്‍ നിന്നും പൊലീസിനു ലഭിച്ചിട്ടുണ്ട്. കുറ്റകൃത്യത്തില്‍ പങ്കുണ്ടെന്ന് സമ്മതിച്ച ആണ്‍കുട്ടി അശ്ലീല സിനിമകള്‍ കാണുന്നതിന് അടിമയായിരുന്നുവെന്നാണ് പൊലീസ് പറയുന്നത്. പെണ്‍കുട്ടിയെ ഒറ്റയ്ക്ക് കണ്ടപ്പോഴാണ് നിര്‍മാണത്തിലിരിക്കുന്ന വീട്ടിലേക്ക് കൂട്ടിക്കൊണ്ടു പോയത്.

പിന്നാലെ ബലാത്സംഗം ചെയ്യാന്‍ ശ്രമിച്ചു. തന്റെ ശ്രമങ്ങള്‍ ചെറുത്തപ്പോള്‍ കല്ലും മരത്തടിയും ഉപയോഗിച്ച് ആക്രമിച്ച് കൊലപ്പെടുത്തുകയായിരുന്നുവെന്ന് പൊലീസ് ഉദ്യോഗസ്ഥര്‍ പറഞ്ഞു. പ്രതിയായ കൗമാരക്കാരനെ ഉടന്‍ ജുവനൈല്‍ ജസ്റ്റിസ് ബോര്‍ഡിനു മുന്നില്‍ ഹാജരാക്കുമെന്നും ഉദ്യോഗസ്ഥര്‍ പറഞ്ഞു.