ഒമ്പതുമാസത്തോളം നീണ്ട ബഹിരാകാശ വാസത്തിന് ശേഷം നാസയുടെ ബഹിരാകാശ സഞ്ചാരികളായ സുനിത വില്യംസും ബുച്ച് വില്‍മോറും ഭൂമിയിലേക്ക് മടങ്ങിവരാന്‍ ഒരുങ്ങുന്നു, മാര്‍ച്ച് 16ന് ഇരുവരും ഭൂമിയിലേക്ക് മടങ്ങുമെന്ന് നാസ ഉദ്യോഗസ്ഥര്‍ സ്ഥിരീകരിച്ചു. നിലവില്‍ അന്താരാഷ്ട്ര ബഹിരാകാശ നിലയത്തിലാണ് ഇരുവരും. ബോയിംഗ് സ്റ്റാര്‍ലൈനറില്‍ 10 ദിവസത്തെ ദൗത്യത്തിനായി പുറപ്പെട്ട ഇരുവരും കഴിഞ്ഞ ഒമ്പത് മാസമായി ബഹിരാകാശ നിലയത്തില്‍ കുടുങ്ങിക്കിടക്കുകയാണ്, ജൂണ്‍ 5ന് ക്രൂവേര്‍ഡ് ഫ്‌ല്‌ളൈറ്റ് ടെസ്റ്റിലാണ് സുനിതയും വില്‍മോറും സ്‌പേസ് സ്റ്റേഷനില്‍ എത്തിയത്. എന്നാല്‍ തിരിച്ചുവരാനുള്ള ദൗത്യം പരാജയപ്പെട്ടതോടെ ബഹിരാകാശ നിലയത്തില്‍ തുടരുകയാിരുന്നു.

മാര്‍ച്ച് 12, 13 തീയതികളില്‍ നടത്താനിരിക്കുന്ന നാസയുടെ സ്‌പേസ് എക്‌സ് ക്രൂ - 10 മിഷന്റെ ഭാഗമായി 4 സഞ്ചാരികള്‍ നിലയത്തില്‍ എത്തി ദിവസങ്ങള്‍ക്ക് ശേഷം സുനിതയ്ക്കും വില്‍മോറിനും മടങ്ങാനാകും. കാലാവസ്ഥ അടക്കമുള്ള ഘടകങ്ങള്‍ അനുകൂലമായാല്‍ മാര്‍ച്ച് 12 രാത്രി 11.48ന് (ഇന്ത്യന്‍ സമയം, 13ന് രാവിലെ 5.18) ഫ്‌ലോറിഡയില്‍ നിന്ന് ഫാല്‍ക്കണ്‍ റോക്കറ്റില്‍ ക്രൂ - 10 പേടകം വിക്ഷേപിക്കും. പേടകത്തിലെത്തുന്ന 4 സഞ്ചാരികള്‍ക്കുവേണ്ട പരിശീലനവും നിര്‍ദ്ദേശങ്ങളും നല്‍കിയ ശേഷം മാര്‍ച്ച് 16ഓടെ സുനിതയ്ക്കും വില്‍മോറിനും മടങ്ങാനാകുമെന്നാണ് പ്രതീക്ഷ.

നിലയത്തില്‍ ഡോക്ക് ചെയ്തിട്ടുള്ള സ്പേസ് എക്സ് ക്രൂ - 9 മിഷന്‍ പേടകത്തിലായിരിക്കും സുനിതയും വില്‍മോറും ഭൂമിയില്‍ തിരിച്ചെത്തുക . ഈ പേടകം സെപ്തംബറിലാണ് നിലയത്തില്‍ എത്തിയത്. നാസ സഞ്ചാരി നിക്ക് ഹേഗ്, റഷ്യയുടെ അലക്സാണ്ടര്‍ ഗോര്‍ബുനോവ് എന്നിവരും മടക്കയാത്രയില്‍ സുനിതയ്‌ക്കൊപ്പമുണ്ടാകും . ക്രൂ - 9 മിഷനിലൂടെയാണ് ഇരുവരും നിലയത്തില്‍ എത്തിയത്. ഫെബ്രുവരിയില്‍ ഇവര്‍ തിരിച്ചെത്തുമെന്നാണ് ആദ്യം നിശ്ചയിച്ചത്. ഇപ്പോള്‍ നാലുപേരും ഒരുമിച്ച് മാര്‍ച്ച് 126ന് മടങ്ങും എന്നാണ് പുതിയ റിപ്പോര്‍ട്ടുകള്‍.