യുഎസ് പ്രസിഡന്റ് ഡോണള്‍ഡ് ട്രംപിനെ വാനോളം പുകഴ്ത്തി പ്രധാനമന്ത്രി നരേന്ദ്ര മോദി. അദ്ദേഹത്തിനു ധൈര്യമുണ്ട്, സ്വന്തം തീരുമാനങ്ങള്‍ എടുക്കുന്നു. 'അമേരിക്ക ആദ്യം' എന്ന ട്രംപിന്റെ നയം തന്റെ 'ഇന്ത്യ ആദ്യം' എന്നതു പോലെയാണെന്നും മോദി പറഞ്ഞു. എഐ (നിര്‍മിത ബുദ്ധി) ഗവേഷകന്‍ കൂടിയായ ലെക്‌സ് ഫ്രിഡ്മാനുമായുള്ള പോഡ്കാസ്റ്റ് അഭിമുഖത്തിലാണു മോദി മനസ്സ് തുറന്നത്.

''യുഎസിലെ ഹൂസ്റ്റണില്‍ 'ഹൗഡി മോദി' പരിപാടിയില്‍ ട്രംപും ഞാനും ഉണ്ടായിരുന്നു. സ്റ്റേഡിയം നിറഞ്ഞു. കായിക മത്സരങ്ങള്‍ക്കു തിരക്കേറിയ സ്റ്റേഡിയങ്ങള്‍ സാധാരണമാണെങ്കിലും, രാഷ്ട്രീയ റാലിക്ക് ഇത്രയും തിരക്ക് അസാധാരണമായിരുന്നു. ഇന്ത്യന്‍ പ്രവാസികള്‍ ധാരാളം പേര്‍ ഒത്തുകൂടി. ഞങ്ങള്‍ രണ്ടുപേരും പ്രസംഗിച്ചു. അദ്ദേഹം താഴെ ഇരുന്ന് എന്റെ പ്രസംഗം ശ്രദ്ധിച്ചു. അതാണ് അദ്ദേഹത്തിന്റെ വിനയം. ഞാന്‍ സംസാരിക്കുമ്പോള്‍ യുഎസ് പ്രസിഡന്റ് സദസ്സിലാണ് ഇരുന്നത്.

പ്രസംഗം അവസാനിപ്പിച്ച് ട്രംപിനു നന്ദി പറയാന്‍ ഞാനിറങ്ങി. സ്റ്റേഡിയത്തില്‍ ചുറ്റിനടക്കാന്‍ ക്ഷണിച്ചു. ഒരു മടിയുമില്ലാതെ അദ്ദേഹം സമ്മതിച്ചു, എന്നോടൊപ്പം നടന്നു. മുഴുവന്‍ സുരക്ഷാ ഉദ്യോഗസ്ഥരെയും ഒഴിവാക്കി. ആ നിമിഷം ശരിക്കും ഹൃദയസ്പര്‍ശിയായിരുന്നു. ഈ മനുഷ്യനു ധൈര്യമുണ്ടെന്ന് അപ്പോഴെനിക്കു മനസ്സിലായി. അദ്ദേഹം സ്വന്തം തീരുമാനങ്ങള്‍ എടുക്കുന്നു. ആ നിമിഷം എന്നെ വിശ്വസിച്ച് എന്നോടൊപ്പം ജനക്കൂട്ടത്തിലേക്ക് വരുന്നു. ഞങ്ങള്‍ തമ്മിലുള്ള പരസ്പര വിശ്വാസത്തിനും ശക്തമായ ബന്ധത്തിനും അന്നു ഞാന്‍ സാക്ഷ്യം വഹിച്ചു''- പ്രധാനമന്ത്രി പറഞ്ഞു.

കഴിഞ്ഞ വര്‍ഷം മൂന്നാം തവണയും വിജയിച്ച പ്രധാനമന്ത്രി മോദി, പ്രസിഡന്റ് ട്രംപിന്റെ 'അമേരിക്ക ആദ്യം' എന്ന മനോഭാവത്തെ പ്രശംസിച്ചു. അത് 'ഇന്ത്യ ആദ്യം' എന്ന തന്റെ സമീപനത്തിനു സമാനമാണെന്നും പറഞ്ഞു. ''പ്രചാരണത്തിനിടെ വെടിയേറ്റപ്പോള്‍, ഞാന്‍ കണ്ടതു ദൃഢനിശ്ചയമുള്ള ട്രംപിനെയാണ്. ആ സ്റ്റേഡിയത്തില്‍ എന്നോടൊപ്പം കൈകോര്‍ത്ത് നടന്നയാള്‍. വെടിയേറ്റശേഷവും അമേരിക്കയ്ക്ക് വേണ്ടി അചഞ്ചലമായി സമര്‍പ്പിതനായി തുടര്‍ന്നു. അദ്ദേഹത്തിന്റെ ജീവിതം രാഷ്ട്രത്തിനു വേണ്ടിയായിരുന്നു. രാഷ്ട്രം ആദ്യം എന്നതില്‍ ഞാന്‍ വിശ്വസിക്കുന്നതുപോലെ, അദ്ദേഹവും 'അമേരിക്ക ആദ്യം' എന്ന മനോഭാവമുള്ളയാളാണ്. അതുകൊണ്ടാണ് ഞങ്ങളുടെ ബന്ധം ശക്തമാകുന്നത്.

ആദ്യമായി വൈറ്റ് ഹൗസില്‍ അദ്ദേഹത്തെ സന്ദര്‍ശിച്ചപ്പോള്‍, ലോകത്തിനു ട്രംപിനെ കുറിച്ചു വ്യത്യസ്തമായ ധാരണയായിരുന്നു. അദ്ദേഹത്തെ കാണുന്നതിനു മുന്‍പ് എനിക്കുപോലും പല വിവരങ്ങള്‍ ലഭിച്ചിരുന്നു. എന്നെ അദ്ഭുതപ്പെടുത്തിക്കൊണ്ട്, ഞാന്‍ വൈറ്റ് ഹൗസില്‍ കാലുകുത്തിയ നിമിഷം അദ്ദേഹം എല്ലാ ഔപചാരിക പ്രോട്ടോക്കോളുകളും ലംഘിച്ചു. സ്വന്തം നിലയ്ക്ക് എന്നെ വൈറ്റ് ഹൗസ് നടന്നു കാണിച്ചുതന്നു. എനിക്കൊപ്പം ചുറ്റിനടക്കുമ്പോള്‍, ഒരുകാര്യം ഞാന്‍ ശ്രദ്ധിച്ചു. ട്രംപിന്റെ കൈവശം കുറിപ്പുകളോ കാര്‍ഡുകളോ ഉണ്ടായിരുന്നില്ല. സഹായിക്കാന്‍ ആരും അദ്ദേഹത്തോടൊപ്പം ഉണ്ടായിരുന്നില്ല. കാര്യങ്ങളെല്ലാം പറഞ്ഞുതന്നതു ട്രംപ് നേരിട്ടാണ്''- മോദി വിശദീകരിച്ചു.