ഇന്ന് വീണ്ടും ആരോഗ്യ മന്ത്രി വീണ ജോര്‍ജ് ഡല്‍ഹിയിലെത്തും. രാവിലെ പത്ത് മണിക്ക് ഡല്‍ഹി അന്താരാഷ്ട്ര വിമാനത്താവളത്തിലെത്തുന്ന മന്ത്രി, അവിടെ നിന്നും കേരള ഹൗസിലേക്ക് പോകും. ഉച്ചയ്ക്ക് ശേഷം കേന്ദ്ര ആരോഗ്യമന്ത്രിയുമായി കൂടിക്കാഴ്ചക്ക് സമയം ലഭിക്കുമെന്നാണ് പ്രതീക്ഷ. ഉച്ചയ്ക്ക് 2 നും മൂന്നിനുമിടയില്‍ കൂടിക്കാഴ്ച നടക്കുമെന്നാണ് പ്രതീക്ഷ.

കഴിഞ്ഞ തവണ ക്യൂബന്‍ സംഘത്തെ കാണാന്‍ ഡല്‍ഹിയിലെത്തിയ ആരോഗ്യമന്ത്രി ജെ പി നദ്ദയുമായി കൂടിക്കാഴ്ചയ്ക്ക് സമയം തേടിയിരുന്നെങ്കിലും പാര്‍ലമെന്റ് നടക്കുന്ന സമയമായതിനാല്‍ ലഭിച്ചില്ല.

തുടര്‍ന്ന് രണ്ട് നിവേദനങ്ങള്‍ ആരോഗ്യമന്ത്രി കേന്ദ്ര മന്ത്രിയുടെ ഓഫീസിലേക്ക് നല്‍കിയിരുന്നു. ആശമാരുടെ ഇന്‍സെന്റീവ് വര്‍ധിപ്പിക്കണമെന്നാണ് ഈ നിവേദനത്തില്‍ ആവശ്യപ്പെട്ടിട്ടുള്ളത്. 2023-24 സാമ്പത്തിക വര്‍ഷത്തില്‍ തടഞ്ഞുവെച്ച 637 കോടി രൂപ എത്രയും വേഗം നല്‍കണം, എയിംസ് അനുവദിക്കണം, കാസര്‍കോടും വയനാടും മെഡിക്കല്‍ കോളേജിന് സഹായം നല്‍കണം തുടങ്ങിയ ആവശ്യങ്ങളാണ് നിവേദനത്തില്‍ ആവശ്യപ്പെട്ടത്. ഈ കാര്യങ്ങള്‍ ഇന്നത്തെ ചര്‍ച്ചയിലും മുന്നോട്ട് വെക്കുമെന്നാണ് പ്രതീക്ഷ.