ലോകാരോഗ്യ ദിനത്തില്‍ 108 സൂര്യനമസ്‌കാരങ്ങള്‍ ചെയ്ത് ഗിന്നസ് ലോക റെക്കോര്‍ഡ് നേടി വിദ്യാര്‍ത്ഥികള്‍. 20,000 വനവാസി വിദ്യാര്‍ത്ഥികളാണ് സൂര്യനമസ്‌കാരത്തില്‍ പങ്കെടുത്തത്.

രണ്ട് മണിക്കൂറാണ് വിദ്യാര്‍ത്ഥികള്‍ സൂര്യനമസ്‌കാരം ചെയ്തത്. പങ്കെടുത്തതില്‍ 13,000-ത്തിലധികവും പെണ്‍കുട്ടികളായിരുന്നു. ആന്ധ്രാപ്രദേശിലെ അല്ലൂരി സീതാരാമ രാജു ജില്ലയിലായിരുന്നു പരിപാടി. ലണ്ടന്‍ വേള്‍ഡ് റെക്കോര്‍ഡ് യൂണിയന്‍ മാനേജര്‍ ആലീസ് റെനോഡാണ് റെക്കോര്‍ഡ് പ്രഖ്യാപിച്ചത്. പട്ടികവര്‍ഗ ക്ഷേമ മന്ത്രി ഗുമ്മാടി സന്ധ്യയാണ് പരിപാടി ഉദ്ഘാടനം ചെയ്തു. നിരവധി ആളുകളാണ് സൂര്യനമസ്‌കാരം കാണാനായി എത്തിയത്.

ജില്ലയിലെ അഞ്ച് മണ്ഡലങ്ങളില്‍ നിന്നുള്ള വിദ്യാര്‍ത്ഥികളാണ് പ്രധാനമായും സൂര്യനമസ്‌കാരത്തില്‍ പങ്കെടുത്തത്. കഴിഞ്ഞ അഞ്ച് മാസമായി പരിപാടിക്കായി തയ്യാറെടുക്കുകയായിരുന്നു ഇവര്‍. ദിവസവും നാല് മണിക്കാണ് വിദ്യാര്‍ത്ഥികളുടെ യോഗ ആരംഭിക്കുന്നത്. വിദ്യാര്‍ത്ഥികളുടെ ആരോഗ്യം, പഠനം, കാര്യക്ഷമത എന്നിവയില്‍ ഗണ്യമായ പുരോഗതി ഉണ്ടായതായി ജില്ലാ കളക്ടര്‍ ദിനേശ് കുമാര്‍ പറഞ്ഞു.