ഇന്ത്യന്‍ മത്സ്യ തൊഴിലാലികള്‍ക്ക്‌ നേരെയുള്ള ശ്രീലങ്കന്‍ സേനയുടെ ആക്രമണം തുടരുന്നു. കൊടിയക്കര തീരത്ത് ശ്രീലങ്കന്‍ നാവികസേനയുടെ വെടിയേറ്റ് ഇന്ത്യന്‍ മത്സ്യത്തൊഴിലാളിക്ക് പരിക്കേറ്റു. കച്ചത്തീവിനുസമീപം ഇന്ത്യന്‍ സമുദ്രാതിര്‍ത്തിക്കുള്ളിലായിരുന്നു സംഭവമെന്ന് മത്സ്യത്തൊഴിലാളികള്‍ പറയുന്നു. 
ലങ്കന്‍ നാവികസേന ആകാശത്തേക്ക് നിറയൊഴിച്ചശേഷം മത്സ്യത്തൊഴിലാളികളെ ആക്രമിക്കുകയായിരുന്നു. തോളില്‍ വെടിയേറ്റ, പോണ്ടിച്ചേരി സ്വദേശിയായ മത്സ്യത്തൊഴിലാളിയെ നാഗപട്ടണത്തെ ആസ്പത്രിയില്‍ പ്രവേശിപ്പിച്ചു.

ഫെബ്രുവരി 26നും തമിഴ്‌നാട്ടില്‍നിന്നുള്ള മത്സ്യത്തൊഴിലാളികള്‍ക്ക് നേരെ ലങ്കന്‍ നാവികസേന ആക്രമണം നടത്തിയിരുന്നു. അതിര്‍ത്തി ലംഘിച്ചെന്ന് ആരോപിച്ച് 16 മത്സ്യത്തൊഴിലാളികളെ ലങ്കന്‍ നാവികസേന കഴിഞ്ഞ ദിവസം അറസ്റ്റുചെയ്തിരുന്നു. 22 പേരെ അറസ്റ്റുചെയ്തിട്ടുണ്ടെന്നാണ് തമിഴ്‌നാട് ഫിഷറീസ് അധികൃതര്‍ അറിയിച്ചിരിക്കുന്നത്.