വധശിക്ഷ നല്‍കില്ലെന്ന്‌ ഇന്ത്യ ഉറപ്പു നല്‍കി: നാവികര്‍ തിരിച്ചെത്തി: ഇറ്റലിയില്‍ പ്രതിഷേധം
കടല്‍ക്കൊല കേസിലെ പ്രതികളായ ഇറ്റാലിയന്‍ നാവികര്‍ ഇന്ത്യയിലേക്ക്‌ തിരിച്ചെത്തി. നാവികര്‍ക്ക്‌ വധശിക്ഷ നല്‍കില്ല എന്ന ഉറപ്പ്‌ ഇന്ത്യന്‍ സര്‍ക്കാരിന്റെ ഭാഗത്തു നിന്ന് ലഭിച്ചതിന്റെ അടിസ്ഥാനത്തിലാണ്‌ സൈനികര്‍ ഇന്ത്യയില്‍ തിരിച്ചെത്തിയത്‌. അപൂര്‍വങ്ങളില്‍ അപൂര്‍വമായ കേസല്ലാത്തതിനാല്‍ സൈനികര്‍ക്ക്‌ വധശിക്ഷ ലഭിക്കില്ലെന്നാണ്‌ ഇറ്റലിയോട്‌ ഇന്ത്യ വ്യക്തമാക്കിയത്‌.
നാവികരായ മാസിമിലിയാനോ ലാത്തോര്‍, സാല്‍വത്തോര്‍ ഗിറോണ്‍ എന്നിവര്‍ ഇറ്റാലിയന്‍ വിദേശകാര്യ സഹമന്ത്രി സെറ്റഫാന്‍ ഡി മിസ്‌തുരക്കൊപ്പം പ്രത്യേക വീമാനത്തിലാണ്‌ ഇന്ത്യയിലെത്തിയത്‌. അതേസമയം നാവികരെ വിചാരണ ചെയ്യുന്നതിനായി പ്രത്യേക കോടതി രൂപീകരിച്ചു. ദില്ലി ഹൈക്കോടതിയാണ്‌ ഉത്തരവ്‌ പുറപ്പെടുവിച്ചത്‌.
നേരത്തെ നാവികരെ ഇന്ത്യയിലേക്ക്‌ തിരിച്ചയക്കില്ലെന്നായിരുന്നു ഇറ്റാലിയന്‍ നിലപാട്‌. കടല്‍ക്കൊല കേസില്‍ രാജ്യാന്തര നിയമപ്രകാരമാണ്‌ നടപടി എടുക്കേണ്ടതെന്നും ,നാവികരെ ഇറ്റാലിയില്‍ വിചാരണ ചെയ്യണമെന്നുമായിരുന്നു അവര്‍ ആവശ്യപ്പെട്ടത്‌.
അതേസമയം നാവികരെ ഇന്ത്യയിലേക്ക്‌ മടക്കി അയച്ച സംഭവത്തില്‍ ഇറ്റലിയില്‍ വന്‍ പ്രതിഷേധം തന്നെ അരങ്ങേറി. വിദേശകാര്യമന്ത്രി ജൂലിയോ ടര്‍സി രാജിവെക്കണമെന്നാണ്‌ പ്രതിഷേധക്കാരുടെ ആവശ്യം.
https://www.facebook.com/Malayalivartha
