ഇറ്റാലിയന്‍ നാവികരുടെ വിചാരണ ഡല്‍ഹിയിലെ പാട്യാല ഹൗസ്‌ കോടതിയില്‍
കടല്‍ക്കൊല കേസിലെ വിചാരണ ഡല്‍ഹിയിലെ ചീഫ് മെട്രോ പൊളിറ്റന്‍ കോടതിയില്‍ നടക്കും. ഡല്‍ഹി ഹൈക്കോടതി ചീഫ് ജസ്റ്റിസിന്റേതാണ്‌ തീരുമാനം. ഇനി ഇക്കാര്യത്തില്‍ അവസാന തീരുമാനം എടുക്കേണ്ടത്‌ സുപ്രീം കോടതി ചീഫ് ജസ്റ്റിസാണ്‌. ഏപ്രില്‍ രണ്ടാം വാരത്തോടെ വിചാരണ തുടങ്ങിയേക്കും. കടല്‍ക്കൊല കേസില്‍ ഇറ്റാലിയന്‍ നാവികരുടെ വിചാരണക്കായി പ്രത്യേക കോടതി രൂപീകരിക്കണമെന്ന്‌ സുപ്രീം കോടതിയാണ്‌ കേന്ദ്ര സര്‍ക്കാരിന്‌ നിര്‍ദേശം നല്‍കിയത്‌. ഏപ്രില്‍ രണ്ടിനാണ്‌ കേസ്‌ വീണ്ടും സുപ്രീം കോടതി പരിഗണിക്കുക.
കേസുമായി ബന്ധപ്പെട്ട എല്ലാ രേഖകളും കൊല്ലം സെഷന്‍സ്‌ കോടതിയിലാണ്‌ ഉള്ളത്‌. ഡല്‍ഹിയില്‍ വിചാരണ നടത്താന്‍ തീരുമാനിച്ച പശ്ചാത്തലത്തില്‍ മലയാളത്തിലുള്ള രേഖകള്‍ പരിഭാഷപ്പെടുത്തേണ്ടി വരും. കൂടാതെ സാക്ഷികള്‍ക്ക്‌ തെളിവുനല്‍കാന്‍ ഡല്‍ഹിക്ക്‌ പോകേണ്ടിയും വരും. ഇത്തരം ബുദ്ധിമുട്ടുകള്‍ ചൂണ്ടിക്കാട്ടി വിചാരണ കേരളത്തില്‍ നടത്തണമെന്ന്‌ ആവശ്യപ്പെട്ട്‌ മുഖ്യമന്ത്രി ഉമ്മന്‍ ചാണ്ടി പ്രധാനമന്ത്രിക്ക്‌ കത്തയച്ചിരുന്നു. എന്നാല്‍ മുഖ്യമന്ത്രിയുടെ ആവശ്യം കേന്ദ്രം തള്ളുകയായിരുന്നു.
https://www.facebook.com/Malayalivartha
