യാത്രാക്കൂലി കൂട്ടാതെ റെയില്‍വേയെ ലാഭത്തിലാക്കിയ നമ്മുടെ ലാലുവും മമതയും എവിടെ? റെയില്‍വേ ടിക്കറ്റ്‌ വര്‍ദ്ധന ഇന്നുമുതല്‍
കന്നുകാലിത്തീറ്റ കുംഭകോണത്തിനു ശേഷം ബീഹാറില്‍ നിന്നും വണ്ടികയറിയ ലാലു പ്രസാദ്‌ യാദവിനെ കാത്തിരുന്നത്‌ റെയില്‍വേ വകുപ്പാണ്‌. അഴിമതിയുടെ ആശാനായ ലാലു റെയില്‍വേയെ കുളം തോണ്ടും എന്നാണ്‌ കരുതിയിരുന്നത്‌. കാരണം ബീഹാറാല്‍ കന്നുകാലികളുടെ പേരില്‍ പോലും അഴിമതികാട്ടിയ ആളാണ്‌ ലാലു. എന്നാല്‍ കേന്ദ്രമന്ത്രിയായതോടെ റെയില്‍വേയെ അടിമുടിമാറ്റി. അടിക്കടി ഉണ്ടായിക്കൊണ്ടിരുന്ന യാത്രാ നിരക്ക്‌ വര്‍ദ്ധന പാടേ ഒഴിവാക്കി. ടിക്കറ്റ്‌ വര്‍ദ്ധിപ്പിക്കാതെതന്നെ റെയില്‍വേയെ ലാഭത്തിലാക്കി. അങ്ങനെ ലാലു പ്രസാദ്‌ യാദവ്‌ സാധാരണക്കാരുടെ പ്രിയതാരവുമായി. പല വിദേശ സര്‍വകലാശാലകള്‍ പോലും ലാലുവിനെ ആദരിച്ചു.
ലാലു മാറിയതോടെ മമത ബാനര്‍ജിയായിരുന്നു റെയില്‍വേ മന്ത്രി. അവരും യാത്രാക്കൂലിയില്‍ കാര്യമായ മാറ്റമൊന്നും വരുത്തിയില്ല. മമതയും മാറിയതോടെ ചാര്‍ജ്‌ വര്‍ധന തുടങ്ങി.
വര്‍ദ്ധിപ്പിച്ച റെയില്‍വേ യാത്രാ നിരക്ക്‌ ഇന്ന്‌ പ്രാബല്യത്തില്‍ വന്നു. അടിസ്ഥാന നിരക്കില്‍ മാറ്റമില്ല. തല്‍ക്കാല്‍, ഉയര്‍ന്ന ക്ലാസുകളിലെ യാത്രാ നിരക്ക്‌, എന്നിവ കൂടാതെ ടിക്കറ്റ്‌ റദ്ദാക്കല്‍ എന്നിവയുടെ കാര്യത്തിലാണ്‌ നിരക്ക്‌ വര്‍ദ്ധനവ്‌. ചരക്ക്‌ കൂലിയുടെ കാര്യത്തില്‍ 5.7 ശതമാനമാണ്‌ നിരക്ക്‌ കൂടിയിരിക്കുന്നത്‌. രണ്ടാം ക്ലാസ്‌ സ്ലീപ്പറിന്റെ റിസര്‍വേഷന്‍ ചാര്‍ജില്‍ വര്‍ദ്ധനവില്ല. ഉയര്‍ന്ന ക്ലാസുകളില്‍ 25 രൂപവരെയാണ്‌ കൂട്ടിയിരിക്കുന്നത്‌. സെക്കന്റ്‌ ക്ലാസിലെ തല്‍ക്കാല്‍ ടിക്കറ്റ്‌ ബുക്ക്‌ ചെയ്യാന്‍ 10 ശതമാനവും എ.സിയില്‍ 30 ശതമാനത്തിന്റെ വര്‍ദ്ധനവാണ്‌ ഉണ്ടായത്‌. ഈയിടെ പാര്‍ലമെന്റില്‍ അവതരിപ്പിച്ച റെയില്‍വേ ബജറ്റിലാണ്‌ നിരക്ക്‌ വര്‍ദ്ധന പ്രഖ്യാപിച്ചത്‌. ഡീസല്‍ വര്‍ദ്ധനവിനെ തുടര്‍ന്നുണ്ടായ പ്രതിസന്ധി പരിഹരിക്കാനാണ്‌ നിരക്ക്‌ വര്‍ദ്ധനയെന്നാണ്‌ റെയില്‍വേയുടെ വിശദീകരണം.
https://www.facebook.com/Malayalivartha
