മുംബൈയില്‍ കെട്ടിടം തകര്‍ന്ന്‌ മരിച്ചവരുടെ എണ്ണം 70 ആയി. മുംബൈയിലെ താനെയിലാണ്‌ ഏഴുനില കെട്ടിടം തകര്‍ന്നത്‌. അറുപതിലധികം പേര്‍ക്ക്‌ പരിക്കേറ്റിട്ടുമുണ്ട്‌. ഇന്നലെ വൈകുന്നേരം 6.30-ഓടെയായിരുന്നു സംഭവം. കെട്ടിടത്തിന്റെ നാലു നിലകളില്‍ മാത്രമാണ്‌ താമസക്കാരുണ്ടായിരുന്നത്‌. മുകള്‍ നിലയില്‍ നിര്‍മാണപ്രവര്‍ത്തനങ്ങള്‍ നടക്കുകയായിരുന്നു. രാത്രി വെളിച്ചക്കുറവു മൂലം രക്ഷാപ്രവര്‍ത്തനം നിര്‍ത്തിവച്ചിരുന്നു. അഗ്നിശമനസേനാംഗങ്ങള്‍ക്കൊപ്പം നാട്ടുകാരും രക്ഷാപ്രവര്‍ത്തനത്തില്‍ പങ്കെടുത്തു.

ദുരന്തനിവാരണ സേനയുടെ നേതൃത്വത്തിലാണ്‌ രക്ഷാപ്രവര്‍ത്തനം നടക്കുന്നത്‌. രാവിലെ എട്ടിന്‌ രക്ഷാപ്രവര്‍ത്തനം അവസാനിപ്പിക്കാനായിരുന്നു തീരുമാനമെങ്കിലും കെട്ടിട അവശിഷ്‌ടങ്ങള്‍ക്കിടയില്‍ കൂടുതല്‍ പേര്‍ കുടുങ്ങിക്കിടപ്പുണ്ടെന്നു സംശയം തോന്നിയതിനാല്‍ തെരച്ചില്‍ തുടരുകയായിരുന്നു. ഇനിയും നിരവധി പേര്‍ അപകടത്തില്‍പെട്ടിട്ടുണ്ടാവുമെന്നാണ്‌ സൂചന.

അതേസമയം കെട്ടിടത്തിന്റെ ഉടമസ്ഥനെതിരെ മനപ്പൂര്‍വമല്ലാത്ത നരഹത്യയ്‌ക്ക്‌ പോലീസ്‌ കേസെടുത്തു. കെട്ടിടനിര്‍മാണത്തിലെ പാകപ്പിഴയാണ്‌ അപകടത്തിനു കാരണമെന്നാണ്‌ പ്രാഥമിക നിഗമനം. ഈ മേഖലയില്‍ ഇത്തരം നിരവധി കെട്ടിടങ്ങളുണ്ട്‌. നിരവധി ആളുകള്‍ തിങ്ങിപ്പാര്‍ക്കുന്ന പ്രദേശമാണിത്‌. മഹാരാഷ്‌ട്ര മുഖ്യമന്ത്രിയും ഉപമുഖ്യമന്ത്രിയും സംഭവസ്ഥലം സന്ദര്‍ശിക്കുമെന്ന്‌ അറിയിച്ചിട്ടുണ്ട്‌.