പ്രധാനമന്ത്രി നരേന്ദ്ര മോഡിയെ ഇന്ത്യന്‍ രാഷ്ട്രീയത്തില്‍ നിന്ന് ഇല്ലാതാക്കുമെന്ന് ബംഗാള്‍ മുഖ്യമന്ത്രി മമതാ ബാനര്‍ജി. നോട്ട് നിരോധനം പിന്‍വലിക്കണമെന്നാവശ്യപ്പെട്ട് കൊല്‍ക്കത്തയില്‍ തൃണമൂല്‍ കോണ്‍ഗ്രസ് പ്രവര്‍ത്തകര്‍ നടത്തിയ റാലിയില്‍ സംസാരിക്കവെയാണ് മമത മോഡിക്കെതിരെ ആഞ്ഞടിച്ചത്.

രാജ്യം ദുരിതത്തിലാണ്, എടിഎമ്മിലും ബാങ്കുകളിലും പണമില്ല. എണ്‍പതോളം പേരാണ് ഇതുവരെ നോട്ട് നിരോധനവുമായി ബന്ധപ്പെട്ട് മരിച്ചവര്‍, മോഡി മൗനത്തിലാണ്, പണ രഹിത സമൂഹം സൃഷ്ടിക്കാന്‍ ക്ലാസെടുത്ത് നടക്കുകയാണെന്നും മമത പരിഹസിച്ചു. ഗ്രാമങ്ങളിലെ ഭൂരിഭാഗം പേര്‍ക്കും ബാങ്ക് അക്കൗണ്ടുകളില്ല, പിന്നെങ്ങനെയാണ് അവര്‍ നോട്ട് നിരോധനത്തിലെ പ്രശ്‌നങ്ങളെ മറികടക്കുകയെന്നും മമത ചോദിച്ചു.

ദൈവത്തെ പോലെ നടിക്കുകയാണ് പ്രധാനമന്ത്രി. വിപണികള്‍, സിനിമ, തിയറ്ററുകള്‍, എല്ലാം ദുരിതമനുഭവിക്കുകയാണ്. എന്നിട്ടും അദ്ദേഹം പൊതുജനങ്ങളെ ഗൗനിയ്ക്കുന്നില്ല' മമത കുറ്റപ്പെടുത്തി. മോഡിയെ ഇന്ത്യന്‍ രാഷ്ട്രീയത്തില്‍ നിന്നും ഇല്ലാതാക്കുമെന്ന് താന്‍ പ്രതിജ്ഞ ചെയ്യുന്നതായും മമത പറഞ്ഞു.
നോട്ട് നിരോധനത്തിനെതിരെ പ്രതിപക്ഷ പാര്‍ട്ടികളെല്ലാം ഇന്ന് രാജ്യവ്യാപകമായി പ്രതിഷേധ ദിനം ആചരിച്ചിരുന്നു. ബംഗാളിലും ത്രിപുരയിലും കേരളത്തില്‍ ഇടതു പാര്‍ട്ടികള്‍ ഹര്‍ത്താല്‍ ആചരിച്ചിരുന്നു. രാജ്യത്തിന്റെ വിവിധ ഭാഗങ്ങളില്‍ പ്രതിഷേധ പ്രകടനങ്ങള്‍ നടന്നു.
നോട്ടുകള്‍ അസാധുവാക്കിയ നടപടി പിന്‍വലിക്കണമെന്നാവശ്യപ്പെട്ട് മമതയുടെ നേതൃത്വത്തില്‍ പ്രതിപക്ഷ പാര്‍ട്ടികള്‍ രാഷ്ട്രപതിയെ കണ്ടിരുന്നു. നോട്ട് നിരോധനം പൂര്‍ണമായും പിന്‍വലിക്കണമെന്നാണ് മമതയും ഡല്‍ഹി മുഖ്യമന്ത്രി അരവിന്ദ് കെജരിവാളും ആവശ്യപ്പെട്ടത്.