നറുക്കെടുപ്പില്‍ വിജയികളായ പ്രവാസികളുടെ വാർത്ത അടുത്തിടെയായി കൂടി വരികയാണ്. ഇപ്പോളിതാ ഓരോ ആഴ്ചയും നടക്കുന്ന തത്സമയ മഹ്സൂസ് ലോട്ടറി നറുക്കെടുപ്പിലെ 22 ലക്ഷം രൂപയുടെ മൂന്ന് സമ്മാനങ്ങളില്‍ രണ്ടും ലഭിച്ചിരിക്കുന്നത് ഇന്ത്യക്കാർക്കാണ്. 32കാരിയായ ജീവിത, 39കാരനായ സുരേഷ് എന്നിവരാണ് ഒരു ലക്ഷം ദിര്‍ഹം, അതായത് 22 ലക്ഷത്തിലേറെ ഇന്ത്യന്‍ രൂപ സ്വന്തമാക്കിയത്. ഫിലിപ്പീന്‍സ് യുവതി യിവോനക്കും (43) വിജയിയായി. സമ്മാനത്തുക കൊണ്ട് ഇന്ത്യയില്‍ ബിസിനസ് ആരംഭിക്കാനാണ് ജീവിതയുടെ തീരുമാനം.

ഷാര്‍ജയില്‍ താമസിച്ച് ദുബൈയില്‍ ഐടി മേഖലയില്‍ ജോലി ചെയ്യുന്ന സുരേഷാണ് മറ്റൊരു വിജയി. ഒരു വയസ്സുള്ള മകന്‍റെ പിതാവാണ് സുരേഷ്. സമ്മാനത്തുകയുടെ ഒരു ഭാഗം ഉപയോഗിച്ച് തന്റെ സാമ്പത്തിക ബാധ്യതകള്‍ തീര്‍ക്കാനാണ് അദ്ദേഹം ഉദ്ദേശിക്കുന്നത്. പ്രതിവാര നറുക്കെടുപ്പില്‍ ഷാര്‍ജയില്‍ താമസിക്കുന്ന ഫിലിപ്പിനോ യിവോന അവരുടെ ജന്മദിനത്തിലാണ് സമ്മാനമടിച്ചത്.

ഫിലിപ്പൈന്‍സിലെ റിയല്‍ എസ്‌റ്റേറ്റില്‍ നിക്ഷേപിക്കാനും തനിക്കും കുടുംബത്തിനും ഒരു ചെറിയ വീട് സ്വന്തമാക്കാനും തുക ഉപയോഗിക്കുമെന്ന് യിവോന പറഞ്ഞു. മകളെ ഡ്രോയിങ് ക്ലാസില്‍ വിടുന്നതിനിടെയാണ് ജീവിത തനിക്ക് ലഭിച്ച് അപ്രതീക്ഷിത ഭാഗ്യത്തെ കുറിച്ച് അറിയുന്നത്. അവിശ്വസനീയമായ ഈ വാര്‍ത്ത ശരിയാണെന്ന് വിശ്വസിക്കാന്‍ തന്നെ ആദ്യം അവര്‍ക്ക് കഴിഞ്ഞില്ല. തന്റെ ജീവിതം ഇതിലൂടെ മാറിമറിയുമെന്ന് ദുബൈയില്‍ വീട്ടമ്മയായ ജീവിതക്ക് ഉറപ്പാണ്.