കണ്ണീര്‍ക്കാഴ്ചയായി.... റിയാദ് ഷിഫയില്‍ സോഫ സെറ്റ് നിര്‍മാണശാലയുടെ ഗോഡൗണിന് തീപിടിച്ചു മരിച്ച മലയാളി യുവാവിന്റെ മൃതദേഹം ഖബറടക്കി...
കണ്ണീര്‍ക്കാഴ്ചയായി.... റിയാദ് ഷിഫയില്‍ സോഫ സെറ്റ് നിര്‍മാണശാലയുടെ ഗോഡൗണിന് തീപിടിച്ചു മരിച്ച മലയാളി യുവാവിന്റെ മൃതദേഹം ഖബറടക്കി. മലപ്പുറം നിലമ്പൂര്‍ വഴിക്കടവ് തോട്ടുംകടവത്ത് സ്വദേശി അബ്ദുല്‍ ജിഷാറിന്റെ (39) മൃതദേഹമാണ് ശുമൈസി ആശുപത്രി മോര്‍ച്ചറിയില്‍ നിന്നും നടപടികള്‍ പൂര്‍ത്തിയാക്കി വ്യാഴാഴ്ച റിയാദ് മന്‍സൂരിയ്യ മഖ്ബറയില്‍ ഖബറടക്കിയത്.
അസീസിയയിലെ പള്ളിയില്‍ മയ്യിത്ത് നമസ്‌കാരം നിര്‍വഹിച്ചു. നടപടികള്‍ക്ക് കെ.എം.സി.സി പ്രവര്‍ത്തകരായ ഉമര്‍ അമാനത്ത്, ഷൗക്കത്ത്, ജംഷി എന്നിവര്‍ക്ക് പുറമെ മലപ്പുറം ജില്ലാ ഒ.ഐ.സി.സി പ്രസിഡന്റ് സിദ്ദിഖ് കല്ലുമ്പറമ്പന്‍, പൊതുപ്രവര്‍ത്തകന്‍ സിദ്ദീഖ് തുവ്വൂര്‍ എന്നിവര്‍ രംഗത്തുണ്ടായിരുന്നു.
ഇക്കഴിഞ്ഞ ചൊവ്വാഴ്ച്ച രാവിലെ 7.30 ഓടെയാണ് അപകടം സംഭവിച്ചത്. തൊട്ടടുത്ത ഗോഡൗണില്‍ തീപിടിത്തമുണ്ടാവുകയും അത് അബ്ദുള്‍ ജിഷാര്‍ പണിയെടുത്തിരുന്ന ഗോഡൗണിലേക്ക് പടര്‍ന്നു പിടിക്കുകയുമായിരുന്നു. ആ സമയത്ത് അവിടെ കൂടുതല്‍ ജീവനക്കാരുണ്ടായിരുന്നെങ്കിലും പുറത്തേക്ക് ഓടി രക്ഷപ്പെട്ടു.
രക്ഷപ്പെടാനായി സഹപ്രവര്‍ത്തകര്‍ വിളിച്ചുപറഞ്ഞെങ്കിലും അകലെ മാറി നിന്ന് ഭാര്യയുമായി ഫോണില്‍ സംസാരിക്കുകയായിരുന്ന ജിഷാറിന് കേള്‍ക്കാന്‍ കഴിഞ്ഞില്ല. അപ്പോഴേക്കും അഗ്‌നി ഗോഡൗണ്‍ മുഴുവന്‍ വിഴുങ്ങിക്കഴിഞ്ഞിരുന്നു. സംഭവമുണ്ടായ ഉടന്‍ സിവില്‍ ഡിഫന്‍സിന്റെ നേതൃത്വത്തില്‍ അഗ്‌നിശമന സേനയും പൊലീസുമെത്തി തീഅണച്ചു. ഉച്ചയോടെയാണ് ജിഷാറിന്റെ മൃതദേഹം പുറത്തെടുത്തത്.
പിതാവ്: അബ്ദുറഹ്മാന്‍, മാതാവ്: മറിയുമ്മ, ഭാര്യ: സക്കിറ. മക്കള്‍: അഫീഫ, റൂബ, ആമീര്‍, അനു. ദീര്‍ഘകാലമായി ഇവിടെ ജോലി ചെയ്യുന്ന അബ്ദുല്‍ ജിഷാര്‍ ഒരാഴ്ച മുമ്പാണ് നാട്ടില്‍ നിന്ന് അവധി കഴിഞ്ഞെത്തിയത്.
"
https://www.facebook.com/Malayalivartha
