നാട്ടിലെത്തിയ പ്രവാസിയെ വീടിനുള്ളിൽ കഴുത്തറുത്ത് മരിച്ച നിലയിൽ കണ്ടെത്തി. കോട്ടയം അടിച്ചിറയിൽ റെയിൽവേ ഗേറ്റിന് സമീപം താമസിക്കുന്ന അരിച്ചിറക്കുന്നേൽ വീട്ടിൽ ലൂക്കോസ് ആണ് മരിച്ചത്. 63 വയസായിരുന്നു. വിദേശത്തായിരുന്ന ലൂക്കോസ് ഏതാനും മാസങ്ങൾക്ക് മുൻപാണ് നാട്ടിലേക്ക് മടങ്ങിയെത്തിയത്. കിടപ്പുമുറിയിൽ മരിച്ച നിലയിൽ കണ്ടെത്തിയതിനെ തുടർന്ന് ലൂക്കോസിന്റെ ഭാര്യ തന്നെയാണ് ഗാന്ധിനഗർ പൊലീസിൽ വിവരമറിയിച്ചത്. സ്വയം കഴുത്തു മുറിച്ചതാണെന്ന് സംശയിക്കുന്നതായി പൊലീസ് പറഞ്ഞു.

ദുരുഹതയിലേക്ക് വിരൽചൂണ്ടുന്നതരത്തിലേക്ക് ഇവിടെ നിന്ന് ഒരു തെളിവും പോലീസിന് ലഭിച്ചിട്ടില്ല. എങ്കിലും ഇദ്ദേഹത്തിന്റെ കഴുത്തിനേറ്റ മുറിവ് ആഴത്തിലുള്ളതാണ് . അതിനാൽ ഈ സാഹചര്യത്തിൽ കൊലപാതക സാധ്യത കൂടി പോലീസ് പരിശോധിക്കുന്നുണ്ട്. പോസ്റ്റ്മോർട്ടം റിപ്പോർട്ട് കൂടി കിട്ടിയ ശേഷം മാത്രമേ കൃത്യമായ മരണ കാരണമെന്തെന്ന് വ്യക്തമാക്കാൻ കഴിയൂ എന്നാൽ പോലീസ് നൽകുന്ന വിവരം.

സംഭവ സമയത്ത് ലൂക്കോസിന്റെ ഭാര്യയും മകനുമാണ് വീട്ടിൽ ഉണ്ടായിരുന്നത്. അതിനാൽ ഇരവരുടേയും വിശദമായ മൊഴി പോലീസ് രേഖപ്പെടുത്തും. ഇന്നലെ വൈകും നേരംവരേയും പൊതുചടങ്ങുകളിൽ പങ്കെടുക്കുകയും നാട്ടുകാരുമായി സംസാരിക്കുകയും ചെയ്തിരുന്ന വ്യക്തിയാണ് ഇദ്ദേഹം. മാത്രമല്ല ഇദ്ദേഹത്തിന് സാമ്പത്തികമായോ മറ്റ് പ്രശ്നങ്ങളോ ഉള്ളതായി ബന്ധുക്കളോടൊന്നും തന്നെ പറഞ്ഞിട്ടില്ല. ഇന്ന് ഒരു ബന്ധുവിന്റെ വിവാഹത്തിനായി കണ്ണൂരിലേക്ക് പോകാനായി ട്രെയിൻ ടിക്കറ്റ് അടക്കം ലൂക്കോസ് ബുക്ക് ചെയ്തിരുന്നു.

അതുകൊണ്ട് ഇത്തരമൊരു സാഹചര്യത്തിൽ അദ്ദേഹം അത്മഹത്യ ചെയ്യില്ലെന്നാണ് ബന്ധുക്കളും സുഹൃത്തുക്കളും പങ്കുവയ്ക്കുന്ന വിവരം. ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം കോട്ടയം മെഡിക്കൽ കോളജിലേക്ക് മാറ്റും. കോട്ടയം ഗാന്ധി നഗർ പോലീസാണ് കേസ് അന്വേഷിക്കുന്നത്.