ആ കാഴ്ച ഹൃദയഭേദകമായി.... നീണ്ട 12 വര്‍ഷത്തെ കാത്തിരിപ്പ്.... ഒടുവില്‍ നാട്ടിലെത്തിയത് ചേതനയറ്റ്... ആ കാഴ്ച കണ്ടു നിന്നവരെയും കണ്ണീരിലാഴ്ത്തി.... ഭാര്യയെയും മകളെയും ആശ്വസിപ്പിക്കാനാവാതെ ഉറ്റവരും ബന്ധുക്കളും നാട്ടുകാരും .

12 വര്‍ഷത്തെ കാത്തിരിപ്പിന് ഒടുവില്‍ നിയമക്കുരുക്കള്‍ മറികടന്ന് സൗദി അറേബ്യയില്‍നിന്ന് നാട്ടിലേക്ക് വരാനിരിക്കെയാണ് ഹരിപ്പാട് സ്വദേശി ഷിജുവിന്റെ (49) മരണം. സൗദിയില്‍ അന്തരിച്ച പള്ളിപ്പാട് പുല്ലമ്പട തയ്യില്‍ വീട്ടില്‍ പരേതനായ കൊച്ചു കുഞ്ഞിന്റെ മകന്‍ ഷിജുവിന്റെ (49) സംസ്‌കാരം വന്‍ ജനാവലിയുടെ സാന്നിധ്യത്തിലാണ് നടന്നു.

നിയമക്കുരുക്കില്‍പ്പെട്ട് 12 വര്‍ഷമായി സൗദിയില്‍ കുടുങ്ങിയ ഷിജുവിന്റെ ചേതനയറ്റ ശരീരം വീട്ടിലെത്തിയപ്പോള്‍ ബന്ധുക്കളുടെ സങ്കടം അണപൊട്ടിയൊഴുകി. ഷിജുവിന്റെ വേര്‍പാട് പള്ളിപ്പാട് ഗ്രാമത്തെയും കണ്ണീരിലാഴ്ത്തി.


സൗദിയിലെ ജുബൈലില്‍ കഴിഞ്ഞ അഞ്ചിനാണു ഷിജു മരിച്ചത്. ഉറക്കത്തിലുണ്ടായ ഹൃദയാഘാതമാണ് മരണകാരണം. ജുബൈലിലെ ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരുന്ന മുതദേഹം വെള്ളിയാഴ്ചയാണു തിരുവനന്തപുരം വിമാനത്താവളത്തില്‍ എത്തിച്ചത്. പള്ളിപ്പാട് സെന്റ് തോമസ് ഓര്‍ത്തഡോക്‌സ് കാതലിക്കേറ്റ് സിംഹാസന പള്ളിയിലായിരുന്നു സംസ്‌കാരം നടന്നത്.

മകള്‍ ഹെലന് രണ്ടര വയസ്സുള്ളപ്പോഴാണു ജോലി തേടി ഷിജു സൗദിയിലേക്കു പോയത്. സൗജന്യ വിസയിലായിരുന്നു യാത്ര. വിവിധ കമ്പനികളില്‍ ജോലി ചെയ്‌തെങ്കിലും വര്‍ക്ക് പെര്‍മിറ്റ് (ഇക്കാമ) ലഭിക്കാത്തതിനാല്‍ നാട്ടിലേക്കു വരാന്‍ കഴിഞ്ഞില്ല. ഒടുവില്‍ 12 വര്‍ഷത്തിനുശേഷം നാടണയാനുള്ള പരിശ്രമം ഫലം കണ്ടു തുടങ്ങിയ ഘട്ടത്തിലാണ് മരണം.

ഷിജുവിന്റെ വരവു പ്രതീക്ഷിച്ചു കഴിഞ്ഞിരുന്ന ഭാര്യ ബിന്‍സിക്കും മകള്‍ ഹെലനും താങ്ങാനാവാത്ത സങ്കടമാണ് ഈ വേര്‍പാട് ഉണ്ടാക്കിയത്. പിതാവിനെ ജീവനോടെ ഒരു നോക്കുകാണാന്‍ കഴിയാതെ പോയതിന്റെ സങ്കടക്കടലിലായിരുന്നു മകള്‍.