യുഎഇയിൽ ബീച്ചിൽ കളിച്ചുകൊണ്ടിരിക്കെ തിരയിൽ അകപ്പെട്ട സഹോദരങ്ങളിൽ 15കാരൻ മുങ്ങിമരിച്ചു. ദുബായിലെ ന്യൂ ഇന്ത്യൻ മോഡൽ സ്‌കൂളിലെ പത്താം ക്ലാസ് വിദ്യാർഥിയായ അഹമ്മദ് അബ്ദുല്ല മഫാസാണ് വെള്ളിയാഴ്ചയുണ്ടായ സംഭവത്തിൽ ദാരുണമായി മരണപ്പെട്ടത്. കാസർകോട് ചെങ്കള സ്വദേശിയും ദുബായിൽ വ്യാപാരിയുമായ മുഹമ്മദ് അഷ്റഫിന്റെയും നസീമയുടെയും മൂന്നാമത്തെ മകനാണ് മഫാസ്. തിരയിലകപ്പെട്ട സഹോദരി ഫാത്തിമയെ ഒരു സ്വദേശി യുവാവ് രക്ഷപ്പെടുത്തി കരയ്ക്ക് എത്തിക്കുകയായിരുന്നു.

ദുബായിലെ അൽ മംസാർ ബീച്ചിൽ വെള്ളിയാഴ്ച്ചയാണ് അപകടം ഉണ്ടായത്. മാതാവ് നോക്കിനിൽക്കെയായിരുന്നു ദുരന്തം. സഹോദരി ഫാത്തിമയ്‌ക്കൊപ്പം ബീച്ചിനോട് ചേർന്ന വെള്ളത്തിൽ കളിക്കുകയായിരുന്നു മഫാസ്. പൊടുന്നനെയാണ് അതിശക്തമായ തിരമാല തീരത്തേക്ക് ആഞ്ഞടിച്ചത്. തിരയിൽപ്പെട്ട് അനുജൻ ഒഴുകിപ്പോവുന്നത് കണ്ട സഹോദരി ഫാത്തിമ അവന്റെ കൈയിൽ മുറുകെ പിടിച്ചെങ്കിലും ശക്തമായ തിരയിൽ നിലത്ത് കാലുറയ്ക്കാതെ അവളും കടലിൽ അകപ്പെടുകയായിരുന്നു.

കുട്ടികളുടെയും കരയിലുണ്ടായിരുന്ന മാതാപിതാക്കളുടെയും നിലവിളി കേട്ട് ഓടിയെത്തിയ ഒരു സ്വദേശി യുവാവാണ് കടലിലകപ്പെട്ട ഫാത്തിമയെ രക്ഷപ്പെടുത്തി കരക്കെത്തിച്ചത്. അപ്പോഴേക്കും മഫാസ് കടലിന്റെ വിദൂരതയിലേക്ക് മറഞ്ഞുപോയിരുന്നു.വിവരമറിഞ്ഞ് കുതിച്ചെത്തിയ ദുബായ് പോലീസിന്റെ നേതൃത്വത്തിൽ ഏറെ നേരം തെരച്ചിൽ നടത്തിയിട്ടും വിദ്യാർഥിയെ കണ്ടെത്താനായില്ല. ഏറെ നേരത്തേ തെരച്ചിലിനൊടുവിൽ ശനിയാഴ്ച വൈകിയാണ് മഫാസിന്റെ മൃതദേഹം ലഭിച്ചത്.