വിമാന യാത്രക്കിടെ ചിലരുടെ മോശമായ പെരുമാറ്റം സഹയാത്രക്കാർ‍ക്കും ജീവനക്കാർക്കും ഒരുപോലെ ബുദ്ധിമൂട്ടുണ്ടാക്കുന്നതാണ്. ഇത് സർവീസുകളെ തന്നെ ബാധിക്കുന്ന അവസ്ഥയിലേക്കുവരെ കാര്യങ്ങൾ എത്തിക്കുന്നു. കഴിഞ്ഞ ദിവസം ദുബൈ എയർപ്പോർട്ടിൽ നിന്നും പുറപ്പെട്ട വിമാനത്തിലും സമാനമായ മോശം പെരുമാറ്റം യാത്രക്കാരനിൽ നിന്നും ഉണ്ടായി. ഇതേതുടർന്ന് വിമാനം അടിയന്തരമായി തിരിച്ചിറക്കേണ്ടിവന്നു. വിമാനത്തിനുള്ളില്‍ യാത്രക്കാരന്‍ മദ്യപിച്ച് മറ്റുള്ളവർക്ക് ശല്യമുണ്ടാക്കുന്ന തരത്തിൽ ബഹളമുണ്ടാക്കുകയായിരുന്നു.

ദുബൈയില്‍ നിന്ന് കോഴിക്കോടേക്ക് പുറപ്പെട്ട ഫ്ലൈ ദുബൈ വിമാനമാണ് തിരിച്ചിറക്കിയത്. വേങ്ങര സ്വദേശിയായ യാത്രക്കാരനാണ് മറ്റുള്ളവർക്ക് ബുദ്ധിമൂട്ടുണ്ടാക്കും വിധം വിമാനത്തിൽ മദ്യപിച്ച് ബഹളമുണ്ടാക്കിയത്. വിമാനം ദുബൈയില്‍ നിന്ന് പുറപ്പെട്ട ശേഷവും ഇയാള്‍ ബഹളം തുടര്‍ന്നു കൊണ്ടിരുന്നു. ഇത് മറ്റ് യാത്രക്കാര്‍ക്ക് ശല്യമായതോടെ വേറെ വഴിയില്ലാതെ വിമാനം ദുബൈ വിമാനത്താവളത്തിൽ തന്നെ തിരിച്ചിറക്കുകയായിരുന്നു.

തുടര്‍ന്ന് പൊലീസ് എത്തി ഇയാളെ ബലമായി പിടിച്ചുകൊണ്ടുപോയി. യാത്രക്കാരില്‍ നിന്ന് വേണ്ട വിവരങ്ങള്‍ ശേഖരിച്ച ശേഷമാണ് ദുബൈ പൊലീസ് ഇയാളെ കൊണ്ടുപോയത്. ഇതിന് ശേഷമാണ് വിമാനം വീണ്ടും കോഴിക്കോടേക്ക് പറന്നത്. രാവിലെ ഏഴു മണിയോടെ കരിപ്പൂരില്‍ എത്തേണ്ട വിമാനം പിന്നീട് രാവിലെ പത്തരയോടെയാണ് എത്തിയത്.