സങ്കടക്കാഴ്ചയായി... സൗദി മധ്യപ്രവിശ്യയിലെ അല്‍ ഗാത്ത്- മിദ്‌നബ് റോഡിലുണ്ടായ വാഹനാപകടത്തില്‍ കോഴിക്കോട് സിവില്‍ സ്റ്റേഷന്‍, കാരപ്പറമ്പ് സ്വദേശി ലൈഫ് സ്‌റ്റൈല്‍ അപ്പാര്‍ട്ട്‌മെന്റ് സെവന്‍ ബി-യില്‍ റഈസ് മരിച്ചു
സൗദി മധ്യപ്രവിശ്യയിലെ അല്‍ ഗാത്ത്- മിദ്‌നബ് റോഡിലുണ്ടായ വാഹനാപകടത്തില്‍ കോഴിക്കോട് സിവില്‍ സ്റ്റേഷന്‍, കാരപ്പറമ്പ് സ്വദേശി ലൈഫ് സ്‌റ്റൈല്‍ അപ്പാര്‍ട്ട്‌മെന്റ് സെവന്‍ ബി-യില്‍ റഈസ് (32) മരിച്ചു.
റഈസിന്റെ കൂടെയുണ്ടായിരുന്ന ഭാര്യ നിദ സഫര്‍ നിസാര പരിക്കുകളോടെ അത്ഭുതകരമായി രക്ഷപ്പെട്ടു. മൃതദേഹം അല്‍ഗാത്ത് ജനറല്‍ ആശുപത്രിയിലേക്ക് മാറ്റിയിരിക്കുകയാണ്.
റിയാദിലെ വഹ്ജ് തുവൈഖ് കോണ്‍ട്രാക്റ്റിങ് കമ്പനിയില്‍ ഐടി ടെക്‌നീഷ്യനാണ് റഈസ്. മിദ്‌നബിലെ ജോലി സ്ഥലത്തേക്ക് പോകുന്ന വഴിയിലാണ് അപകടം നടന്നത്. റഈസ് സഞ്ചരിച്ച കാറും എതിരെ വന്ന മിനി ട്രക്കും കൂട്ടിയിടിക്കുകയായിരുന്നു. അപകടത്തില്‍ കാര്‍ പൂര്‍ണമായും തകര്‍ന്നു. അപകടത്തിന്റെ ആഘാതത്തില്‍ റഈസ് സംഭവസ്ഥലത്ത് വെച്ച് തന്നെ മരിച്ചു.
ദമ്മാമില്‍ മുന്‍ പ്രവാസിയായ എറമാക്കി വീട് അബ്ദുറഹ്മാന്‍ ബറാമിയുടെയും കാതിരിയകം രഹനയുടെയും മകനാണ് റഈസ്. റയാന്‍ ബറാമി, പരേതയായ റുഷ്ദ ഫാത്തിമ എന്നിവരാണ് റഈസിന്റെ സഹോദരങ്ങള്‍. റിട്ടയേര്‍ഡ് ജോയിന്റ് ആര്‍.ടി.ഒ കുണ്ടങ്ങലകം സഫറുള്ളയുടെ മകളാണ് റഈസിന്റെ ഭാര്യ നിദ സഫര്‍. മൃതദേഹം സൗദിയില്‍ ഖബറടക്കും. അതിനുവേണ്ടിയുള്ള നിയമനടപടികള്‍ പൂര്‍ത്തിയാക്കാന്‍ റിയാദ് കെഎംസിസി മലപ്പുറം ജില്ല വെല്‍ഫെയര്‍ വിങ്ങും അല്‍ ഗാത്ത് കെഎംസിസിയും രംഗത്തെത്തിയിട്ടുണ്ട്.
https://www.facebook.com/Malayalivartha
