യൂറോപ്പിന്റെ സാമ്പത്തിക തലസ്ഥാനമായ ഫ്രാങ്ക്ഫര്‍ട്ടിലെ അന്തരാഷ്ട്ര എയര്‍പോര്‍ട്ടില്‍ നിന്നും സപ്തംബര്‍ 1 മുതല്‍ എയര്‍ബസ്സ് 380 തുടങ്ങുന്നു. എമിരേറ്റ് എയര്‍വെയ്‌സ് എക്‌സിക്യൂട്ടീവ് വൈസ് പ്രസിഡന്റ് തീറി അന്റിനോറി അറിയിച്ചതാണിത്. എമിരേറ്റ് എയര്‍വെയ്‌സിന്റെ ആദ്യ യൂറോപ്യന്‍ ഫ്ലൈറ്റ് തുടങ്ങിയത് ഫ്രാങ്ക്ഫര്‍ട്ടില്‍ നിന്നുമാണ്. അന്നുമുതല്‍ ലോകമെമ്പാടുമുള്ള ബിസിനസ്സ് യാത്രക്കാര്‍ക്കും, ടൂറിസ്റ്റുകള്‍ക്കയും എമിരേറ്റ് എയര്‍വെയ്‌സ് ഫ്രാങ്ക്ഫര്‍ട്ടിലേക്കും, തിരിച്ചും സര്‍വീസ് നല്‍കി വരുന്നു. ഈ സര്‍വീസ് കൂടുതല്‍ സൗകര്യപ്രദമായി വ്യാപിക്കാനാണ് ഇപ്പോള്‍ എയര്‍ബസ്സ് 380 തുടങ്ങുന്നത്.

ഫ്രാങ്ക്ഫര്‍ട്ടില്‍ നിന്നും തുടങ്ങുന്ന എയര്‍ബസ്സ് 380 ഡബിള്‍ ഡെക്കര്‍ എയര്‍ ക്രാഫ്റ്റിലെ സുഖസൗകര്യങ്ങള്‍ ഇപ്രകാരമാണ്. സുഖപ്രദമായ സ്‌നാനം, ഓണ്‍ബോര്‍ഡ് ബാര്‍, പതിനൊന്ന് ലോകഭാഷകളില്‍ 1700 ചാനലുകളില്‍ ഇഷ്ടമുള്ള മ്യൂസിക്കും, ചലച്ചിത്രങ്ങളും, ന്യൂസ് ചാനല്‍, ഇഷ്മുള്ള വിവിധതരം മെനു, ഡ്രിങ്ക്‌സ്. ഇതിന് പുറമെ പ്രൈവറ്റ് ക്യാബിനില്‍ 180 ഡിഗ്രി ഫ്ലാറ്റ് ബെഡ്, പ്രൈവറ്റ് ബാര്‍ എന്നിവകളുണ്ട്. ദിനംപ്രതി ഇ.കെ. 45 എയര്‍ബസ്സ് 380 ഡബിള്‍ ഡെക്കര്‍ രാവിലെ 8.25 ന് ദുബായ് അന്തരാഷ്ട്ര എയര്‍പോര്‍ട്ടില്‍ നിന്നും പുറപ്പെട്ട് ഉച്ചക്ക് 13.15 ന് ഫ്രാങ്ക്ഫര്‍ട്ടില്‍ എത്തുന്നു. ഈ വിമാനം ഇ.കെ. 46 ആയി ഫ്രാങ്ക്ഫര്‍ട്ടില്‍ നിന്നും പുറപ്പെട്ട് രാത്രി 23.35 ന് ദുബായ് എയര്‍പോര്‍ട്ടില്‍ തിരിച്ചെത്തും. ഇതിലെ യാത്രക്കാര്‍ക്ക് ദുബായ് എയര്‍പോര്‍ട്ടില്‍ നിന്നും ഇന്ത്യയിലേക്കുള്ള എല്ലാ എമിരേറ്റ് എയര്‍വെയ്‌സ് ഫ്ലൈറ്റുകള്‍ക്കും കണക്ഷന്‍ ലഭിക്കും.