മലയാളി വാര്ത്ത.
യു.എ.ഇയുടെ വിവിധ ഭാഗങ്ങളില് തിങ്കളാഴ്ച കനത്ത മഴ പെയ്തു. മഴയും മൂടല് മഞ്ഞും കാരണം ഏതാണ്ട് 400 വാഹനാപകടങ്ങള് സംഭവിച്ചു. നിരവധി പേര്ക്ക് പരിക്കേറ്റു. ദുബൈയില് മാത്രം രാവിലെ ആറിനും ഉച്ചക്ക് ഒന്നിനും ഇടയില് ഏഴു മണിക്കൂറിനകം 330 അപകടങ്ങള് റിപ്പോര്ട്ട് ചെയ്തു. വൈകിട്ട് എമിറേറ്റ്സ് റോഡിലുണ്ടായ അപകടത്തില് മൂന്നു ദക്ഷിണേഷ്യക്കാര് മരിച്ചു.
ദുബൈയില് രാവിലെ ആറിനും ഉച്ചക്ക് ഒന്നിനും ഇടയില് പൊലീസ് കമാന്ഡ് ആന്ഡ് കണ്ട്രോള് റൂമില് റിപ്പോര്ട്ട് ചെയ്ത 330 അപകടങ്ങളില് ആറെണ്ണം ഗുരുതരമാണ്. അപകടങ്ങളെയും പരിക്കേറ്റവരെയും സംബന്ധിച്ച വിശദ വിവരങ്ങള് ലഭിച്ചിട്ടില്ല. തിങ്കളാഴ്ച വൈകിട്ട് 3:10ന് എമിറേറ്റ്സ് റോഡിലെ വര്ഖ ഇന്റര്ചെയ്ഞ്ചിലുണ്ടായ അപകടത്തിലാണ് മൂന്നു ദക്ഷിണേഷ്യക്കാര് മരിച്ചത്. സുഡാനി അമിത വേഗത്തില് ഓടിച്ച വാഹനം, റോഡരികില് നിര്ത്തിയിട്ട മറ്റൊരു വാഹനത്തില് ഇടിക്കുകയായിരുന്നു. പാകിസ്താന്, ബംഗ്ളാദേശ്, ഇറാന്, നേപ്പാള് എന്നീ രാജ്യക്കാരായ അഞ്ച് പേരാണ് നിര്ത്തിയിട്ട വാഹനത്തിലുണ്ടായിരുന്നത്. ഇതില് മൂന്നു പേര് തല്ക്ഷണം മരിച്ചു. രണ്ടു പേര്ക്ക് പരിക്കേറ്റു.
വാഹനത്തിന് തകരാര് സംഭവിച്ചതിനെ തുടര്ന്ന് ഇവര് എമിറേറ്റ്സ് റോഡിലെ റാശിദിയ എക്സിറ്റിന് സമീപം വര്ഖ ഇന്റര്ചെയ്ഞ്ചിന് താഴെ നിര്ത്തിയിട്ടതായിരുന്നു. അമിത വേഗത്തില് വന്ന സുഡാനിയുടെ വാഹനം നിയന്ത്രണം വിട്ടതാണ് അപകടത്തിന് ഇടയാക്കിയത്. ഈ വാഹനം ഷാര്ജ ഭാഗത്തേക്ക് പോകുകയായിരുന്നു.