കാനഡയിലെ ഒരു മൃഗാശുപത്രിയില്‍ നിന്നുള്ള ദൃശ്യങ്ങള്‍ സമൂഹമാധ്യമങ്ങളില്‍ ചിരിപടര്‍ത്തുന്നു. ആ ആശുപത്രിയിലെത്തിയ രണ്ടു 'രോഗികള്‍' പരസ്പരം കാണാന്‍ ഇടയായ സന്ദര്‍ഭമാണ് ചിരിക്ക് വകനല്‍കുന്നത്.

വലിയ കണ്ണുകളും നിറയെ രോമങ്ങളുമുള്ള ഒരു സുന്ദരന്‍ പൂച്ച ഉടമയായ ലിന്‍സേ മാക്കസിക്കൊപ്പം തന്റെ പതിവ് ആരോഗ്യപരിശോധനകള്‍ക്കായി അവിടെ എത്തിയതായിരുന്നു. ടിജെയെന്നാണ് അവന്റെ പേര്. അപ്പോഴാണ് മറ്റൊരു രോഗിയെ ഒരു ബോക്‌സിനുള്ളിലാക്കി അവിടെ കൊണ്ടുവന്നത്.

ആ ബോക്‌സില്‍ നിന്ന് ആ 'രോഗി' ഇഴഞ്ഞിറങ്ങുന്നത് കണ്ട് ഞെട്ടിത്തരിച്ചു നില്‍ക്കുന്ന പൂച്ചയുടെ ചിത്രങ്ങള്‍ സമൂഹമാധ്യമങ്ങളില്‍ ചിരിപടര്‍ത്തുന്നു. ഒരു പാമ്പിനെ ആയിരുന്നു ആ ബോക്‌സില്‍ മൃഗാശുപത്രിയില്‍ എത്തിച്ചത്. അത് കണ്ട് ഒരു ഒന്നൊന്നര ഞെട്ടലാണ് പൂച്ച ഞെട്ടിയത്. പേടിച്ചു വിറച്ച് പിന്‍കാലുകളില്‍ നിവര്‍ന്ന് നിന്നാണ് പാമ്പിനെ വീക്ഷിച്ചത്.

ജീവിതത്തില്‍ ഇന്നേവരെ പാമ്പിനെ കണ്ടിട്ടില്ലാത്തതിനാല്‍ ടിജെയ്ക്ക് അത് അദ്ഭുതമായി. ഒപ്പം പേടിയും. അതാകാം പാമ്പിനെ അദ്ഭുതത്തോടെ നോക്കി നിന്നതെന്ന് ഉടമ വ്യക്തമാക്കി. ഇതേവരെ ടിജെ ഇങ്ങനെ നില്‍ക്കുന്നത് കണ്ടിട്ടില്ലെന്നും ഉടമ പറഞ്ഞു. ഉടമ തന്നെയാണ് ഈ ദൃശ്യങ്ങള്‍ പകര്‍ത്തിയതും സമൂഹമാധ്യമങ്ങളിലൂടെ പങ്ക് വച്ചതും. എന്തായാലും ട്രോളാന്‍ പറ്റിയ മുഖവുമായി നില്‍ക്കുന്ന ടിജെയാണ് ഇപ്പോള്‍ സമൂഹമാധ്യമങ്ങളിലെ താരം.